Në kushtet kur “bluzat e bardha” në Shqipëri janë demonizuar si njerëz që e kanë mendjen vetëm tek paraja, vjen dhe rasti i një mjekeje, që edhe pse në pension, vijon t`u shërbejë pacientëve me një përkushtim të habitshëm që rrezaton humanitet të rrallë.
Ajo është Marie Ruka, të cilën e has në ambientet e spitalit të Laçit. Mbi të gjitha ka dhe drojen për t`u prezantuar, si tregues i një modestie në ushtrimin e detyrës.
“Nuk mund dhe ta quajë humanizën, pasi thjeshtë u kam shërbyer banorëve të qytetit tim. Këtu 40 vite që u shërbej banorëve të Kurbinit dhe e kam të vështirë të ndahem prej tyre”, thotë ajo.
Dhe nuk është e rastit që, të gjithë pacientet që kanë nevojë për shërbime pediatrike, ta kërkojë gjithnjë atë, Marien pra, mjeken, që duket sikur është dhe e zemrave, më shumë se fizikut të fëmijëve.
“Jam prej 5 vitesh në pension, por nuk qëndroj dot në shtëpi kur shoh shumë njerëz që paraqiten pranë spitalit, ndërkohë që mungojnë dhe specialistët. Unë kam patur tërë mundësitë të ndërtoja dhe klinikë private, që të mund dhe të fitoja më tepër, por ja që nuk është gjithçka paraja”, të thotë Maria, që dhe me fjalë pra të “shëron” prej sëmundjeve që mund të ketë karakteri yt.
Ndaj sot, më shumë se kurrë, pasi dhe kushte në spitale në shërbim të pacientëve janë vështirësuar, ajo u bën apel kolegëve ngado në Shqipëri, atyre që njeh dhe atyre që nuk njeh, që të përkushtohen sa më shumë në profesionin e tyre human, për t`iu shërbyer njerëzve pa kushte.
Përgatiti: Ahmet Zani – tesheshi.com
