Ish-numri një i botës në periudha të ndryshme kohore, e tani numri shtatë në renditjen botërore të tenisteve, rusja Maria Sharapova pritet të lajmërojë sonte në një konferencë shtypi tërheqjen nga tenisi.
Tërheqjen e kanë lënë të kuptohet problemet e shumta fizike të tenistes 28-vjeçare ruse, si dhe dhënia e lajmit për konferencën e sotshme të shtypit, të përmbledhur në fjalët “për një lajmërim të madh”.
Konferenca e shtypit që do të jetë pas pak orësh nuk ka qenë e programuar, duke u dhënë udhë hamendësimeve. Sharapova ka vuajtur gjatë viteve të fundit nga një sërë dëmtimesh, dhe në tetë muajt e fundit ka marrë pjesë në vetëm tre veprimtari. Më i fundit ishte në turneun Australian Open, ku u eliminua në çerekfinale nga Serena Uilliams.
Sharapova ka fituar në karrierën e saj pesë tituj Grand Slam, përpos dhjetëra titujve të tjerë. Titullin e parë Grand Slam e fitoi në 2004-ën, duke e ngritur trofeun e Wimbledon-it në moshën 17 vjeç. Dy vite më vonë do të fitonte turneun US Open, dhe në 2008-ën do të pasonte fitimi i Grand Slam-it të Australian Open. Grand Slam-et e fituara do t’i plotësonte në 2012-ën, kur do të shpallej fituese dhe në French Open. Suksesin në Roland Garros do ta përsëriste në vitin 2014. /tesheshi.com/
