Kalimi i portugezit Ronaldo nga Reali i Madridit te Juventusi nuk ka qenë një transferim i zakonshëm i një lojtari, por një katalizator për t’i ridhënë jetë një kampionati që prej kohës e kishte humbur shkëlqimin dhe vëmendjen.
Ronaldo përbën lajm sot në Itali në çdo hap të hedhur, ndërkohë që rivalët e Juventusit, edhe pa portugezin gjithsesi dominues të padiskutueshëm, janë të detyruar të përforcohen për të mos dështuar që në javët e para të garës në sezonin e ri.
E përditshmja sportive spanjolle “Marca” u kushton një analizë jo shumë të gjatë zhvillimeve në futbollin italian, me Ronaldo-n në sfond.
“Seria A është përsëri superfuqi e tregut të transferimeve,” shkruan “Marca” duke iu referuar shifrave, me kampionatin italian që vjen në vend të dytë pas atij anglez për shpenzimet e bëra gjer tani.
Maradona, Platini, Gacoigne, Matthaus, Bergkamp, Ronaldo Nazario dhe Zidane janë ca prej ish-lojtarëve që e përditshmja spanjolle i përmend si protagonistë të Serisë A në shkëlqimin e saj vite më parë.
“Marca” kujton se ekipet italiane luajtën në 25 finale në aktivitetet europiane në vitet 1990, duke marrë 13 trofe.
Mes transferimeve të kësaj vere, sigurisht që vendi i parë i takon Juventusit, me blerjen e Ronaldo-s, por që po përgatit dhe kthimin e Bonucci-t.
Napoli, nënvizon “Marca”, ka ulur në stol një arkitekt të ri, Carlo Ancelotti-n, ndërsa perandoria romake, duke iu referuar ekipit të Romës, ende po ndërtohet. Justin Kluivert dhe Javier Pastore janë mes të ardhurve te Roma.
Po ashtu premtuese janë zhvillimet te dy ekipet e Milanos. Nainggolan është një përforcim i Interit, ku pritet të vijë dhe Arturo Vidal. Milani do të sigurojë me shumë mundësi shërbimet e argjentinasit Higuain, një prej sulmuesve më të fortë të Serisë A.
Gjithçka është premtuese për Serinë A me 895 milionë eurot e shpenzuara gjer tani mes pesë kampionateve më të forta të Europës, duke lënë prapa La Ligën, Bundesligën dhe Ligën e Parë franceze. /tesheshi.com/
