E përditshmja sportive spanjolle Marca, duke marrë shkas nga largimi i mesfushorit brazilian Oscar nga Çelsi për te një prej klubeve të Superligës kineze, një prirje që pritet të vijojë me transferimin e Tevez-it, ka bërë një renditje të dhjetë transferimeve më të shtrenjta në futbollin kinez.
Marca vë në vend të parë pikërisht Oscar-in, që kaloi te Shanghai SIPG për 61 milionë euro. Pas tij rendit një tjetër brazilian, Hulk-un, që nga Zeniti u transferua më herët te e njëjta skuadër kineze për 55 milionë euro. Në vend të tretë vjen Alex Teixeira, një tjetër transferim i këtij viti. Ai kaloi te Jiangsu Suning për 50 milionë euro, duke lënë kampionatin ukrainas, ku aktivizohej me skuadrën më të suksesshme atje, Shakhtarin e Donjeckut.
Vijnë pastaj në radhë, Jackson Martinez, Ramires, Elkenson, Gervinho, Paulino, Fredy Guarin dhe Demba Ba.
Tendencën në rritje të transferimit të lojtarëve në kampionatin kinez, posaçërisht të atyre që nuk janë në fund të karrierës, Antonio Conte, trajneri i Çelsit, e quajti ditë më parë një kërcënim për të tëra klubet europiane.
Një tendencë që ka shenja se do të bëhet më e fortë, teksa nuk reshtin ofertat jashtëzakonisht të larta për lojtarët e ligave më të mira europiane. /tesheshi.com/
