Spanjolli i Repsol Honda-s thuajse nuk ka patur kundërshtar në garën e Austin-it në SHBA. E katërta fitore radhazi për Marquez-in në këtë garë, për të njëjtin pilot që kryeson dhe kampionatin.
Ai i ka të tëra rekordet në garën e quajtur ndryshe Circuit of the Americas, xhiron më të shpejtë në garën e djeshme, xhiron më të mirë, xhiron rekord të pistës.
Gara e djeshme qe e tëra e tij, për të marrë kryesimin prej xhiros së parë, pasi u sfidua për pak momente nga Lorenzo. Një garë e interpretuar përsosurisht nga Marquez, që dje nuk njohu rivalë.
Lorenzo asnjëherë nuk mundi ta kapë ritmin e bashkëpatriotit, Valentino Rossi e la garën që në xhiron e tretë i rrëzuar, siç bënë dhe Pedrosa e Dovizioso pak xhiro më vonë.
Në fund, pas gati 44 minutash, Marquez ka kaluar i pari finishin e garës në Austin, duke u shpallur sërish fitues. I pasuar nga Jorge Lorenzo i Yamaha-s dhe Andrea Iannone i Ducati-t.
Marquez e kryeson dhe kampionatin pas vetëm tre garash, me 66 pikë. Lorenzo e Rossi të Yamaha-s vijnë në vend të dytë e të tretë, përkatësisht me 45 e 33 pikë.
Gara e katërt sezonale është pas dy javësh, e do të zhvillohet në Spanjë, në Jerez. /tesheshi.com/
