Rrugët ku do të zhvillohet gjysmë maratona e Tiranës do të nisin të bllokohen që të premten në mesnatë, pasi do të zhvendosen të gjitha makina e parkuara përgjatë bulevardit kryesor.
Të shtunën, duke nisur nga ora 5 e mëngjesit nuk do të lejohet qarkullimi i atuomjeteve pasi deri në orën 12 do të zhvillohet “Fun Runing”.
“Gjatë së shtunës, nga ora 8 deri në 12 e gjysmë do të jenë të bllokuara sheshi Nënë Tereza, rruga Lekë Dukagjini, në të dy krahët e universitetit, si dhe bulevardi “Dëshmorët e Kombit”. Ky bllokim afekton edhe heqjen e parkimit të makinave përgjatë bulevardit, rrugës Lekë Dukagjini dhe ndarjen e linjave të transportit publik, si ajo e Tiranës së Re, kopshtit Zoologjik dhe Aliasit”, deklaron Enton Punavia, drejtor i Transportit në Bashki.
Gjatë fundjavës, edhe transporti publik do të funksionojë në mënyrë të reduktuar dhe me gjysmë itinerare.
“Për shkak se bllokohet aksi veriut, janë të gjitha linjat e transportit që punojnë me gjysmë itinerar dhe numër të reduktuar. Do të thotë që autobusët nuk shkojnë nga Instituti Bujqësor deri tek uzina, por rruga ndahet përgjysmë. Pra, pasagjerët që nisen nga Instituti do të vijnë deri tek Zogu i Zi dhe do të kthehen mbrapsht, ose pasagjerët që nisen nga ish-uzina e autotraktorëve do të vijnë deri tek ura dhe pastaj do të kthehen mbrapsht”, sqaron Punavia.
Gara, e cila do të shndërrohet në një ditë pa makina, ul ndotjen dhe nxit aktivitetin fizik tek njerëzit. /tesheshi.com/
