Strumica, qytet në juglindje të Maqedonisë, rezulton të jetë djep i politikanëve maqedonas të cilët me veprimtarinë e tyre lënë gjurmë në historinë më të re të shtetit. Njëri nga ta, ishte ish presidenti Boris Trajkovski, që humbi jetën në aksident ajror, ndërsa një tjetër që sot bënë pjesë në sferën e interesit publik është Zoran Zaev, lider i Lidhjes Social Demokrate tw Maqedonisë, i cili gëzon mandatin e tretë të kryetarit të komunës së Strumicës.
A do të arrijë të rrëzojë Nikola Guruevskin dhe të kompensojë të humburën rrugë euro-atlantike të shtetit?! Përkrahja e bashkësisë ndërkombëtare, deri tani nuk i ka munguar.
Shikuar nga aspekti i politikës ditore, ai është në rrugë të drejtë si askush më parw, sepse me sulmin të cilin po i’a bënë kokës së pushtetit me të ashtuquajturat “bomba përgjimesh”, ai po arin efekt të dyfishtë. E para, zgjon opinionin e zhytur në letargji dhe tjetra është tronditja që i’a bën skenës politike.
Me materialet e përgjimeve, Zaev preku të paprekshmit, u bë objekt i vëmendjes së jashtzakonshme, paraqitja publike e të cilit po zbardh anën e erët të pushtetit, por dilema e vetme që parashtrohet është se vallë ekonomisti i suksesshëm fitoi përvojë të mjaftueshme politike për të zgjuar të papërcaktuarit politikisht dhe të menaxhojë situatën. Kjo mbetet të shihet në zgjedhjet e ardhshmë të cilat duken të pashmangshme këtë vit.
E kaluara e Zaevit…
Në politikë hyri në vitin 1996, si anëtarë i Lidhjes Social Demokrate të Maqedonisë, për të zënë pastaj vend në organet komunale partiake, më vonë deputet dhe tani lider i partisë, por ai asnjëherë nuk e braktisi qytetin e lindjes Strumicën, ku aktualisht mban postin kryetarë i komunes. Në rrethana siç ka Maqedonia, me ekonomi të brishtë dhe pa mbështetje të pushtetit qendëror, madje me kërcënime dhe shantazhe, Zaev po mban kondicionin ekonomik, ndërsa komuna të cilën e drejton, bashkë me një tjetër, janë të vetmet në Maqedoni që kanë liçencën ‘Mjedis i Favorshëm Afarist’, që nënkupton ‘pa probleme pronsore juridike’, me plan-detaj urbanistik edhe administratë të aftë. Suksesi i tij, është ajo që bën njerëzit të shpresojnë se Maqedonia mund të dalë nga humnera ekonomike.
Pikat e forta dhe të dobëta të Zaevit…
Mbrapa tij, nuk ka dosje kriminale, së paku jo në procedurë. Rasti me qendrën tregëtare “Global” në vitin 2007, kur u arestua për të marë më pastaj pafajsi nga presidenti i atëhershëm Crvenkovski, mbetet e vetmja njollë në karrierën e tij politike. Zoran Zaev qëndroi afër Branko Crvenkovskit kur ishte kryetarë i LSDM-së, ashtu siç u qëndroi afër Vllado Buckovskit dhe Radmila Shekerinskës, kur këta ishin në postin më të lartë partiak të LSDM-së. Pavarsisht përçarjeve brendapartiake, Zaev asnjëherë nuk mori epitetin e personit konfliktuoz, por përkundrazi, besnikëria ishte ajo që e veçonte.
Qëndrimi karshi shqiptarëve
Figura e Zaevit në kontekst me shqiptarët shihet me dioptri të ndryshme. Eshtë fakt i pamohueshëm se nuk njihet për albanofob, madje ka patur bashkëpunim korrekt me subjekte shqiptare, por nga ana tjetër, ai asnjëherë nuk ka qenë pjesë e ekzekutivit për të dëshmuar se qytetarët e shtetit nuk i dallon për nga përkatësia etnike apo fetare, prandaj kjo e fundit mbetet për t`u dëshmuar, por sidoqoftë, konstatimi i parë, është aksiomatik..
Shqiptarët e Maqedonisë, që nuk kanë të veshur petkun e tifozit partiak, te Zaevi shohin njeriun i cili mund të pastrojë shpirtërisht skenën politike dhe bëjnë tifo që të shpalosë dhe skandalet e politikanëve shqiptarë, për çka Zaevi pretendon të ketë materiale komprometuese, të mara nëpërmjet shërbimeve të huaja sekrete. Kjo sipas tyre do të dezinfektojë politikbërjen shqiptare, kurse nga ana tjetër, skeptikët thonë se “bombat” kanë për qëllim vetëm ardhjen e LSDM-së në pushtet. Po të bëjmë nje retrospektivë, platforma e LSDM-së, kurrë nuk ka qenë dalje për shqiptaret nga hendeku i diskriminimit egocentrik. Në memorjen kolektive të shqiptarëve, LSDM mbahet mend për sajimin e kushtetutës përjashtuese të vitit 1991, mbahet mend për viktimat e dhunës policore në “Bit Pazar” dhe Gostiva, dhe burgosjet politike te Rufi Osmanit dhe Alajdin Demirit, prandaj Zoran Zaev para vetes ka një detyrë, të dëshmojë se skenaret antishqiptare janë e kaluar e hidhur dhe se garnitura e re brenda LSDM-së, nuk ka përse të trashëgojnë fajin e dikujt tjetër.
Ndoshta edhe për këtë arsye, fushata aktuale e tyre mban titull:”E vërteta, për Maqedoninë”. /tesheshi.com/
