Mensur Krasniqi
Që Maqedonia ndodhet para një kaosi ekonomik dëshmon fakti që Ministria e Financave vetëm 3 ditë pasi që Qeveria morri hua jashtë vendit 270 milion euro, tani kjo ministri kërkon edhe 100 milion euro tjera nga kreditorët e vendit. Jo më larg se pardje ministri i financave nga rradhët e VMRO-së, Zoran Ztavrevski deklaroi që qytetarët duhet të jenë të qetë për shkak se me marrjen e huas jashtë vendit janë siguruar para për pagesën e rregullt të rrogave dhe të pensioneve, ndërsa sot del dhe akuzon LSDM-në për veto, duke u kërcënuar që nuk do të ketë paga dhe pensione në qoftë LSDM në dhjetor nuk lejon për të marrë kredinë prej 100 milion eurove.
Pra falë zëvendësministrit plotësues të financave, nga rradhët e LSDM-së, Kire Naumov, po parandalohet thellimi i borxhit të Maqedonisë. Sipas LSDM-së është tërësisht e pasaktë që me të drejtë ligjore të vetos për borxhin më të ri të qytetarëve prej 100 milionë euro në tregun vendor rrezikohet pagesa e pagave, pensioneve dhe transfereve sociale, andaj ata vlerësojnë se çdo borxh i ri paraqet tentim për financimin e formave të ndryshme të mashtrimeve për fushatat parazgjedhore dhe korrupsionin.
Kundër borxhit të ri të ministrisë së financave “kinse” për të mbuluar mbuluar pagat dhe pensionet në Republikën e Maqedonisë, kanë dalë edhe ish ministrat e financave Petar Goshev dhe Xhevdet Hajredini. Sipas Goshevit, pagat dhe pensionet nuk duhet mbuluar me borxh, por me të hyrat nga ekonomia.
“Nëse është ashtu, atëherë pse lejuan që të vijmë në një situatë që me kredi të paguhen paga dhe pensione. Kjo është pyetja qendrore për të cilën kemi paralajmëruar me vite, se nuk duhet që të merren kredi për paga dhe pensione, por për diçka tjetër me të cilën krijohen para. Por pushteti tani po ngritë panik, pasi që dukshëm i duhen para për t`i blerë zgjedhjet, dhe shikoni gjithandej ata po derdhin para, po krijojnë borxhe. Nëse nuk ka të hyra nga ekonomia, pse po i rrisin pensionet dhe pagat para zgjedhjeve. Jemi dëshmitar të një skenari të ngjashëm nga viti 2012 kur u përjashtuan deputetët, me rrëfimin e njëjtë, nëse nuk ka buxhet dhe nëse nuk miratohet borxhi, nuk do të petë paga dhe pensione”, ka reaguar Petar Goshev.
Ndërkaq Xhevdet Hajredini thotë se gjendjet e këtilla në ministrinë e financave për pagat dhe pensionet që u zbuluan nga ana e vetos së zëvendës ministrit të financave tregojnë se në çfarë mënyra po menaxhohet me paratë e shtetit.
“Është punë e habitshme që të dëgjojmë tani nga njeriu i cili dhjetë vite po na bind se buxheti është në kondicion të mirë, se po mbushet sipas të planifikuarës dhe menjëherë dëgjojmë se nëse nuk futemi borxh do të ngelemi pa paga dhe pensione. Po krijohet frikë të cilën ministri i financave tani po dëshiron që këtë gjë ta shfrytëzoj, por ai po futet në një kurth tjetër, tashmë ai duhet të sqaroj se ku janë paratë, pse deri më tani thoshte se gjithçka është në rregull, prej ku doli tani kjo gjë? Por, si duket ka edhe obligime tjera të mëdha të cilat po fshihen, ka presion nga njerëzit që duhet të marrin dhe nuk pajtohen që të presin edhe më andej për kërkesat e tyre. Për këtë arsye është edhe kjo nervozë. Tani do të zbulohen shumë probleme të fshehura. Një kohë të gjatë jemi futur borxh me kamata të larta, ndërsa rritja e GDP është shumë më e ulët që është një humbje e pastër, duhet rritje për t`u kthyer kamatat, dhe ne po shkojmë në minus. Por, nuk më habit që urgjentisht ta mbledhin Komisionin Shtetëror të Zgjedhjeve dhe ta prishin një vendim të këtillë, gjithçka është e mundur”, paralajmëroi Hajredini.
Në ditët në vazhdim mbetet të shohin nëse LSDM-ja do lëshon pe, dhe të lejojë Maqedoninë të futet në një kredi të re, që sipas LSDM-së, kjo kredi do i shërbejë nevojave të VMRO-së për kampanjën e tyre parazgjedhore. /tesheshi.com/
