Pas Shqipërisë, edhe Maqedonia ka vendosur masa drakoniane në Kodin Penal për shitjen dhe blerjen e votës.
Siç bën të ditur televizioni shqiptar “Shenja” me qendër në Shkup, kanë hyrë në fuqi ndryshimet në Kodin Penal të Maqedonisë që parashikojnë minimum 5 vjet burg për atë që kapet duke shitur votën.
Dënimi prej të paktën 5 vite burg parashikohet jo vetëm në rastet kur merren paratë, por edhe në ato raste kur premtohet ose dakordohet shitja e votës dhe ende pa marrë shpërblimin e fituar.
Sipas Kodit, do të dënohet edhe ai “që përdor dhunë, kërcënim serioz, përdorim të varësisë zyrtare, ekonomike ose të punës ose formë tjetër, që do të ndikojë te tjetri të tregojë nëse ka votuar dhe si ka votuar”.
Me ndryshimet në Kodin Penal parashikohen dënime drakoniane edhe për personat që pengojnë procesin zgjedhor në të gjitha fazat: ditën e votimit, shpalljen e rezultateve, dëmtimin e materialit zgjedhor dhe vepra të tjera.
Dënimi minimal për pjesën dërmuese të këtyre veprave fillon nga 3 deri në 5 vite burg, duke u rritur varësisht nga natyra e veprës dhe dëmet e shkaktuara. /tesheshi.com/
