Pas refuzimit të presidentit Gjorgje Ivanov për ta nënshkruar ratifikimin e Marrëveshjes mes Maqedonisë dhe Greqisë për çështjen e emrit, e njëjta sot është rikthyer në votim për herën e dytë, me ç’rast sipas ligjit kësaj rradhe është dashur të votohet me shumicë parlamentare. Kështu deputetët me 69 vota pro dhe 1 të përmbajtur ri-ratifikuan këtë marrëveshje.
Vetëm deputeti Ferid Muhiq votoi përmbajtur, duke thënë se “me këtë Marrëveshje janë shkelur të drejtat ndërkombëtare”.
Në këtë seancë parlamentare mungonin deputetët e opozitës maqedonase të cilët paraprakisht kishin njoftuar se do ta bojkotojnë këtë proces.
Ndryshe, ligji për ratifikimin e marrëveshjes me Greqinë, mes tjerash parasheh ndryshimin e emrit kushtetues, nga Republika e Maqedonisë në Republika e Maqedonisë së Veriut.
Sipas kushtetutës dhe Rregullores së Kuvendit, në rast të vetos së presidentit të shtetit, ligji përsëri shkon në procedurë kuvendore, por atëherë do të duhet të votohet me shumicë absolute nga numri i përgjithshëm i deputetëve, gjegjësisht do të duhet që të marrë së paku 61 vota. Ligji në këtë rast përsëri dërgohet te presidenti, i cili sipas Kushtetutës, e ka obligim që ta nënshkruajë.
Megjithatë, praktika thotë se presidenti di edhe ta shkelë Kushtetutën, që do të thotë se edhe në këtë rast të mos e nënshkruajë dekretin, ashtu siç është rasti me ligjin për përdorimin e gjuhëve, që ende është i bllokuar te presidenti. /tesheshi.com/
