Prej sot, Maqedonia udhëhiqet nga qeveria e re me kryeministër Zoran Zaev, duke mbyllur kështu një cikël krize të pazakontë në këtë vend që shkoi deri në gjakderdhje, ndonëse pa viktima. Kabineti i ri morri votëbesimin në parlamentin që tashmë udhëhiqet nga një shqiptar, Talat Xhaferi. Koalicioni LSDM-BDI dhe Aleanca për Shqiptarët morri 62 vota, ku pesëshja e BESËS abstenoi e 44 vota ishin kundër.
Zaev tha se qeveria e tij do të jetë e përkushtuar për reforma të thella. Ai premtoi dhe ruajtjen e karakterit unitar të Maqedonisë dhe respektimin e plotë të Kushtetutës, një çështje për të cilën është akuzuar rregullisht nga VMRO, duke kërkuar që të shmanget gjuha nacionaliste dhe të respektohet të gjithë etnitetet në Maqedoni.
Fill pas miratimit, përshëndetja e parë qeverisë së re maqedonase i ka ardhur nga Uashingtoni.
“Si mike dhe partnere e Maqedonisë, SHBA-të me padurim presin që të punojnë me qeverinë e re për plotësimin e aspiratave euro-atlantike të vendit, për zbatimin e reformave urgjente me të cilat do të forcohet sundimi i ligjit dhe pavarësia e gjyqësorit, liria e mediave dhe përgjegjësia e qeverisë”, thuhet në urimin amerikan ndaj kabinetit të ri të Zoran Zaev. /tesheshi.com/
