Maqedonia nis të enjten zyrtarisht bisedimet e pranimit me NATO-n tha ministrja e Mbrojtjes, Radmilla Shekerinska në një konferencë të përbashkët për shtyp në Shkup me Nikolla Dimitrov, Ministri i Punëve të Jashtme dhe Stevo Pendarovski, koordinator kombëtar për NATO-n.
Me fillimin e bisedimeve të pranimit me NATO-n, Maqedonia hyn në fazën e dytë. Faza e parë e procesit filloi me një thirrje nga NATO në korrik 2018.
“Ne hyjmë në biseda me shumë optimizëm dhe dëshirë për sukses. Para nesh është një shans që vendi ynë të bëhet një anëtar i aleancës më të fuqishme për sigurinë kolektive me në krye Shtetet e Bashkuara, për një cilësi më të lartë jete”, tha Shekerinska.
Ministrja e Mbrojtjes u bëri thirrje deputetëve të të gjitha partive politike në Parlamentin maqedonas që ta tregojnë veten me veprime.
“Anëtarët e të gjitha partive politike janë përpara mundësive dhe përgjegjësive historike. Duke shtypur butonin ‘pro’, ata marrin pjesë në hapat e fundit të një maratone 27-vjeçare për t’u bashkuar me shtëpinë tonë në NATO. Suksesi i Maqedonisë varet nga vendimi i tyre”, tha Shekerinska.
Ministri i Jashtëm Nikola Dimitrov përkujtoi deklaratën e parë të Kuvendit në vitin 1993, ku të gjitha partitë politike theksuan se e ardhmja e Maqedonisë është në NATO.
“Këtë javë, 18 dhe 19 tetor, fillon procesi i negociatave të pranimit. Ky është një proces i shkurtër. Ai do të përfundojë në fund të këtij viti ose në fillim të vitit të ardhshëm. Ne kemi përgatitur një program për reformat e vazhdueshme, me theks sundimin e ligjit dhe reformën gjyqësore, në luftën kundër korrupsionit dhe krimit të organizuar”, tha Dimitrov. /tesheshi.com/
