Nga Mensur Krasniqi
Situata në vendkalimin kufitar të pjesës jugore të Maqedonisë me Greqinë, vazhdon të jetë e tendosur nga protestat e emigrantëve të shumtë që nuk lejohen të hyjnë në Maqedoni. Bëhet fjalë për disa mijëra persona që vijnë nga vendet ku nuk ka vatra lufte, por që ikin nga shtetet e tyre për shkak të kushteve të rënda jetësore, andaj edhe nga autoritetet quhen si refugjatë ekonomikë.
Ata nuk lejohen të hyjnë në Maqedoni nga frika se mund të mbeten në territorin e saj, pasi rrugëtimi i tyre përfundon në kufirin me Serbinë, ku autoritetet e atjeshme refuzojnë pranimin e tyre.
Revolta e refugjatëve është përshkallëzuar pas nisjes së punimeve për vendosjen e gardhit me gjemba. Ata përveç protestave kanë sulmuar edhe policinë ku për pasojë 18 pjesëtarë kanë marrë lëndime të lehta trupore.
Nga Ministria e Shëndetësisë, dje informuan se dy nga policët kanë marrë goditje në kokë përmes helmetës, një në pjesën e mbi gjurit dhe një në pjesën e abdomenit, që nuk është tragjike, ndërsa të tjerët tani më janë lëshuar në shtëpi.
Ndërkaq, Avokati i Popullit Ixhet Memeti në një intervistë për radio Evropa e Lirë lidhur me krizën e refugjatëve në kufirin greko-maqedonas, ka deklaruar se sulmi terrorist në Paris nuk duhet lidhur me krizën e refugjatëve në Europë dhe se Maqedonia duhet të respektojë marrëveshjet ndërkombëtare dhe ligjet e saj.
“Mendoj se në çdo rast nuk do të duhej që liderët serioz ta vendosin në masë të njëjtë atë që ndodhi në Paris si akt terrorist me krizën e refugjatëve. Mendoj se Maqedonia mundet shumë të bëjë, ajo obligohet që t`i respektoje marrëveshjet ndërkombëtare dhe ligjet tona. Mjafton që Maqedonia dokumentet e tilla t`i respektoj dhe të mos ketë asnjë problem. Pse e them këtë? Pasi që deklarata për refugjatët është bazë e të gjitha atyre elementeve ose fondamenteve të mos diskriminimit, mos dënimit dhe mos kthimit. Ne po shohim se pasi që nisi kriza në Republikën e Maqedonisë, këto tre principe po thyhen, që nuk është në rregull”, deklaroi Ixhet Memeti.
Ai shtoi se Republika e Maqedonisë në dy raste, pa nevojë, në vend kalimet kufitare ku kishte incident midis policisë dhe refugjatëve duke përdorur shok-bombat dhe përdorimin e forcës fizike, dha një pasqyrë të keqe për vendin. Andaj Maqedonia duhet të jetë kundër çfarëdo lloji diskriminimi të refugjatëve.
“Çka po na ndodh tani, unë apeloj në respektimin e marrëveshjeve ndërkombëtare, nuk mundet që Maqedonia të diskriminojë mbi baza etnike, këtë gjë konventa nuk e lejon”, përfundoi Memeti.
Në kufirin me Greqinë, për të hyrë në Maqedoni, besohet të jenë disa mijëra refugjatë “ekonomikë”, ndërkohë që numri i të tjerëve nga vatrat e luftës, ditëve të fundit ka shënuar rënie.
Sipas të dhënave të Ministrisë së Punëve të Brendshme të Maqedonisë, në pesë muajt e fundit nëpër Maqedoni kanë kaluar rreth 300 mijë refugjatë, por ky numër mund të jetë edhe më i lartë, pasi shumë të tjerë kanë hyrë në mënyrë ilegale, për t’u ikur procedurave të regjistrimit.
Për dallim nga java që shkoi, gjendja në Gjevgjeli sot është pak më e qetë. /tesheshi.com/
