Kombëtarja e Maqedonisë do të luajë ndeshjen e radhës eliminatore ndaj Izraelit në transfertë. Kjo përballje cilësohet mjaft e vështirë për skuadrën e trajnerit Igor Angelovski, duke qenë se izraelitët kanë një ekip të fortë dhe këtë e kanë treguar, sidomos në shtëpinë e tyre.
Megjithatë në deklaratën e dhënë pas mbërritjes së skuadrës në Haifa, Angelovski nuk kërkon të fshihet dhe shpalos objektivin për këtë përballje.
“Kjo ndeshje është mjaft e rëndësishme për ne, pasi e dimë mirë se një fitore ndaj Izraelit do të na kthente në garë për vendin e tretë të klasifikimit, së bashku me Shqipërinë dhe Izraelin. Kur kanë nisur këto eliminatore jam shprehur se çdo pozicion brenda vendit të katërt do të ishte një arritje për Maqedoninë dhe ditë pas dite ne jemi duke punuar për ta realizuar këtë objektiv.
Fitorja ndaj Izraelit do të jetë mjaft e rëndësishme, pasi do të na japë moral për ndeshjet e radhës që do të kemi në grup”, tha Angelovski.
Në vijim ai shprehet se dëshira jonë është për fitore në ndeshjen që do të luajmë në Haifa. “Duhet të kemi besim në cilësitë tona dhe në faktin se mund t’i përgjigjemi mirë kundërshtarit si në aspektin tekniko-taktik, ashtu edhe në atë fizike. Kështu mund t’ia arrijmë objektivit që kemi”, tha trajneri maqedonas./tesheshi.com/
