Brukseli e ka pritur me entuziazëm votimin e parlamentit maqedonas që u hapi
rrugë ndryshimeve kushtetuese në funksion të Marrëveshjes së Prespës, duke
finalizuar ndryshimin e emrit nga Maqedoni në Republika e Maqedonisë
Veriore.
Dyshja Mogherini – Hahn, përcollën menjëherë përgëzimet e tyre.
“Ne përgëzojmë parlamentin për
votimin mbi ndryshimet kushtetuese. Ky është një hap i rëndësishëm në zbatimin
e marrëveshjes historike të Prespës”, tha Mogherini dhe Han në një
deklaratë të përbashkët.
Zyrtarët e BE vlerësoi se liderët politikë të Maqedonisë dhe qytetarët kanë
treguar një vendosmëri për të kapur mundësinë “unike dhe historik”
për të adresuar një nga “problemet më të vjetra në rajon” dhe për të
ecur përpara me vendosmëri me Bashkimin Evropian.
“BE fuqimisht e mbështet këtë
marrëveshje, e cila është një shembull i pajtimit në rajon dhe në të gjithë
Evropën”, thanë zyrtarët e BE.
Zyrtarët e BE-së thanë se janë në pritje të zbatimit të plotë të Marrëveshjes
së Prespës, të arritur midis Athinës dhe Shkupit për emrin e ardhshëm të
Maqedonisë, e ku BE-ja vazhdon të mbështesë plotësisht Maqedoninë në arritjen e
qëllimit të saj strategjik – integrimin në BE.
Gjithashtu, edhe Sekretari i Përgjithshëm i NATO-s Jens Stoltenberg përgëzoi
Shkupin.
“NATO mbështet fuqishëm zbatimin e
plotë të marrëveshjes, i cili është një kontribut i rëndësishëm për një rajon
të qëndrueshëm dhe të begatë”, tha Stoltenberg.
Edhe kryeministri grek Alexis Tsipras “ka përgëzuar kolegun nga
ish-Republika Jugosllave e Maqedonisë (IRJM), Zoran Zaev në përfundimin e
suksesshëm të rishikimit të Kushtetutës së IRJM, në bazë të Marrëveshjes së
Prespës”, AKSH.
Mediat e Athinës kujton se “Greqia dhe IRJM nënshkruan një marrëveshje
historike në qershor 2018, duke zgjidhur çështjen që ka qëndruar prej kohësh në
mes të dy vendeve” dhe se kjo marrëveshje “duhet të ratifikohet në
parlamentet e të dy vendeve”.
Ambasadori i SHBA-ve në Shkup, Jess Baily, tha se “ne jemi duke pritur padurim për të mirëpritur Republikën e Maqedonisë
Veriore si anëtar 30-të të NATO-s dhe për të vazhduar partneritetin tonë të
fortë në promovimin e stabilitetit dhe prosperitetit në të gjithë
rajonin”.
“Shtetet e Bashkuara përshëndesin
vendimin e deputetëve maqedonas. Kur procesi të përfundojë me ratifikimin nga
Greqia, kjo marrëveshje përfundimisht do të zgjidhë një mosmarrëveshje për
emrin që ka bllokuar gjatë qytetarët maqedonas nga realizimi i synimeve të tyre
për t’u bashkuar me NATO dhe BE”, tha ai. /tesheshi.com/
