Bisedimet maratonike të eurokomesarit Johannes Hahn i shoqëruar nga tre deputetët e Parlamentit Evropian, Eduard Kukan, Ivo Vajgl dhe Richard Hoëitt me liderët e partive politike në Shkup, kanë rezultuar me marrëveshje përfundimtare për dalje nga kriza.
Me t`u aritur marrëveshja, Han tha se “kjo është një ditë e shkëlqyer për vendin sepse do të hapë derën drejt perspektivës euro-atlantike”.
“Do të doja të falenderoj anëtarët e Parlamentit Evropian për kontributin e tyre, ambasadorin amerikan dhe ambasadorin e BE-së, por gjithashtu edhe ekipin e partnerëve tanë. Mendoj se mund të jeni krenar për udhëheqësit tuaj në këtë vend. Ata mësuan që të arrijnë kompromis në mënyrë që të shpien vendin tuaj në një të ardhme të begatshme”, shtoi më tej Han.
Ndërsa liderët politikë, e njëherësh kundërshtarët e përbetuar, Zoran Zaev dhe Nikolla Gruevski, pas orës tre të mëngjesit të sotëm, kanë folur para mediave dhe secili me versionit e vet.
Sipas liderit opozitar Zaev, marrëveshja konfirmon atë të cilën e kanë folur në vazhdimsi se Nikolla Gruevski dhe bashkëpunëtorët e tij më të afërt sundojnë në mënyrë kriminale dhe se janë të zhytur në korrupsion: “Nikolla Gruevski do të japë dorëheqje dhe nuk do të udhëheqë qeverinë e cila do të organizojë dhe zbatojë zgjedhjet që do të mbahet më 24 prill të vitit të ardhshëm. Largimi i Gruevskit nga qeveria do të ndodhë deri në fund të këtij viti, dhe zgjedhja e qeverisë së re do të jetë jo më vonë se 15 janari. Ajo që ne e premtuam, e realizuam. Nikolla Gruevski nuk do të organizojë dhe zbatojë zgjedhjet! LSDM do të propozojë ministrin e ri të brendshëm. Do të emërohet prokuror publik i veçantë i cili do të jetë përgjegjës për të hetuar përmbajtjen e provave dhe argumenteve nga projekti ‘E vërteta për Maqedoninë’”, tha Zaev.
Ndërsa nga ana e tij, kryeministri Gruevski, i cili ka negociuar në cilësi të kryetarit të VMRO-së, tha se është i kënaqur nga e aritura: “LSDM-ja do të kthehet në parlament më shtator. Është dakorduar një zgjidhje sistemore që në të gjitha zgjedhjet e ardhshme parlamentare, qeveria të dorëhiqet 100 ditë para zgjedhjeve, dhe të formohet qeveri për zbatim të zgjedhjeve”, tha Gruevski, sipas të cilit VMRO do të nominojë një kryeministër të përkohshëm i cili do të kryejë funksionin nga data 15 janar e deri më 24 prill.
Pikat e marrëveshjes:
Liderët e katër partive politike në Maqedoni me ndërmjetësimin e eurokomisionerit për zgjerim Johannes Hahn janë marrë vesh që:
Opozita maqedonase e udhëhequr nga LSDM të kthehet në Parlament më 1 shtator;
Qeveria aktuale të tërhiqet 3 muaj para zgjedhjeve apo deri në fund të 15 dhjetorit 2015;
Qeveria e përkohshme apo kalimtare të formohet deri më 15 janar 2016;
VMRO-DPMNE nominon kandidatin për kryeministër (deri 15 janar 2016), por në konsulta edhe tri partitë e tjera LSDM, BDI dhe PDSH; Zgjedhjet e parakohshme parlamentare do të mbahen më 24 prill 2016;
LSDM do të nominojë kadidatin për ministër të Ministrisë së Punëve të Brendshme, por siç thuhet në konsultime edhe me LSDM dhe BDI;
Ndarja e ministrive tjera do të jetë midis partive kryesore, ndërsa edhe zëvendësministrat do të kenë të drejtën e qasjes dhe vetos në gjitha ministritë për çështjet e lidhura me zgjedhjet;
LSDM zëvendësministra do të ketë në ministrinë e financave, bujqësisë dhe shoqërisë informatike dhe administratës;
Prokurori i ri Special do të duhet të zgjidhet deri më 15 shtator 2015, që do të udhëheq hetimet për përgjimet dhe do të zgjidhjet sipas marrëveshjes midis katër partive politike;
Nga kthimi i opozitës në Parlament do të nis miratimi i pakos së reformave për zgjedhjet dhe reformat e tjera, por edhe rekomandimet speciale nga raporti i ekspertëve të Komisionit Evropian të udhëhequr nga Rajnhard Pribe.
Përgatiti: Bekim Laci – tesheshi.com
