Nën sloganin “Së bashku luftojmë, së bashku do të kemi sukses!” Maqedonia e Veriut festoi të dielën Ditën e Pavarësisë.
Në këtë ditë, 33 vjet më parë, më shumë se 95 për qind e qytetarëve votuan për një shtet të pavarur dhe sovran në një referendum.
Paraprakisht, më 25 janar 1991, Deklaratën e Pavarësisë e miratoi Kuvendi i parë shumëpartiak i Maqedonisë, ndërsa dy ditë më vonë deputetët zgjodhën Kiro Gligorovin për president të parë të Republikës së pavarur dhe sovrane të Maqedonisë, kujton Radio Evropa e Lirë.
Presidentja Gordana Siljanovska Davkova dërgoi një mesazh urimi për qytetarët në të cilin theksoi se është detyrë e liderëve maqedonas që “të lënë anash përçarjet dhe të bashkohen rreth të mirës së përbashkët dhe interesit publik”.
“Duhet të investojmë të gjitha kapacitetet tona personale dhe institucionale për ta bërë Republikën e Maqedonisë një vend të denjë për të jetuar, i cili do t’u japë shanse të barabarta për përparim të gjithë qytetarëve të saj, një republikë e cila do të kujdeset për më të mirën, përfshirë të ndryshmet, në solidaritet me të pambrojturit dhe të drejtë për të gjithë”, thotë Davkova në urim.
Një moment historik
Kryetari i Kuvendit Afrim Gashi, në pritjen që organizoi në Dhomën e Ligjvënësit me rastin e festës së Pavarësisë, tha se nuk ka moment më të rëndësishëm në historinë e një vendi sesa pavarësia e tij.
Gashi, një figurë e re politike ndër shqiptarët e Maqedonisë, theksoi se secili ka meritën dhe kontributin e vet në këto arritje, duke theksuar se “nuk duhet të jemi nihilistë dhe disfatistë”.
“Në ditëlindjen e saj të 33-të, Maqedonia e Veriut është anëtare e aleancës më të fuqishme të sigurisë së NATO-s, e cila garanton paqen në kufijtë e saj, e cila është jashtëzakonisht e rëndësishme për çdo projekt dhe është në rrugë të mbarë për t’iu bashkuar bashkimit më të madh të suksesshëm të demokracisë, paqes, të drejtave të njeriut dhe mirëqenies, që është Bashkimi Evropian”, tha Gashi.
Kujtjmë se Maqedonia ishte e para republikë ish-jugosllave e fitoi Pavarësinë me referendum dhe pa luftë. E dyta pas saj do ishte Mali o Zi. Ndërsa e shkëputura e parë, Sllovenia, pati gjithsesi pak orë luftë, me afro dhjetë të vrarë.
Lufta për Maqedoninë do vinte dhjetë më vonë, me një rebelim të armatosur shqiptar në emër të të drejtave etnike, e cila do çonte në një luftë disajavore, duke përfunduar me Marrëveshjen e Ohrit. /tesheshi.com/
