Nga Miradie Hasani
Në Maqedoni, personat e varur nga droga shpeshherë shpëtimin e tyre e shohin tek Qendrat për Rehabilitim në Shkup, e specializuar për këtë kategori. Por kur terapitë janë në bazë ditore ata e mundësojnë këtë duke ndjekur atë të metadonit. Të tillë, Qendra e Rehabilitimit që punon brenda Klinikës Shtetërore në Shkup ka 150 pacientë, ku atyre u ofrohet terapi shërimi për t’iu larguar varësisë nga droga.
Por puna e tyre në kuadër të Klinikës Shtetërore në të cilën ndodhen edhe mbi 10 spitale të tjera, si ajo e kardiologjisë, gjinekologjisë, e kirurgjisë, klinika e fëmijëve dhe të tjera, duket se po i shqetëson mjekët dhe pacientët e klinikave përreth.
Disa mjekë nga klinikat që ndodhen afër Qendrës së Rehabilitimit thonë se edhe pse personat e varur nga droga vijnë të shërohen, disa nuk iu përmbahen synimit për t’u shëruar dhe vazhdojnë me të njëjtin avaz. Ata ankohen se përreth spitaleve të tyre shohin shiringa që janë të hedhura pikërisht nga pacientët e Qendrës për Rehabilitim.
Mjekët e shqetësuar thonë se më kritike bëhet situata kur janë në orar të kujdestarisë, meqë në errësirë ndodhin gjërat e pahijshme nga të njëjtët pacientë.
“Gjatë kohës kur duhet të jem kujdestare, shpesh u them kolegëve se nuk kam me çka të udhëtoj dhe se frikësohem natën . Në fakt rrugëve ka ndriçim dhe njerëz, kurse prej hyrjes kryesore e deri sa ta mbërrij në vendin e punës duhet të kalojë edhe kah qendra u mjekohen të varurit nga droga, dhe andej shoh shiringa të përdorura nga vetë ata. Unë jam mjeke në spitalin e lëkurës, dhe kur punoj kujdestare asnjëherë nuk shfrytëzoj pauzën për të dalë jashtë objektit të punës”, thotë një mjeke e spitalit të lëkurës.
“ Shiringat dhe fshehja e pacientëve nëpër qoshe të spitaleve të ndryshme ka bërë që të dëgjohen zëra nga mjekët se kërkojnë të dislokohet kjo Qendër. Ndoshta edhe ata quhen pacientë sikur pacientët tanë mirëpo ka disa që nuk duan të shërohen. Kjo Qendër duhet të dislokohet”, thotë një mjek nga reparti i kardiologjisë.
Qendra për Rehabilitim punon në kuadër të Spitalit Psikiatrik i cili gjendet në periferi të Shkupit. Qamil Kovaçi, drejtori i këtij spitali thotë se nuk ekziston vullnet për ndarjen e Qendrës nga Klinika Universitare “Nënë Tereza”, dhe se nuk përjashton mundësinë që kjo të ndodhë nëse krijohet situatë më shqetësuese dhe nëse Ministria e Shëndetësisë do të merrte vendim për transferim të pacientëve në objekt tjetër.
“Institucioni ynë është në kontakt të vazhdueshëm me Ministrinë e shëndetësisë dhe deri më tani nuk kemi informatë që ne si institucion të shfrytëzojmë atë objekt në kuadër të klinikës shtetërore “Nënë Tereza”, që do të na transferonte dokun tjetër. Për momentin vazhdojmë të funksionojmë këtu ku jemi.
Ne jemi në komunikim me klinikat tjera që janë afër saj dhe nuk kemi ndonjë shqetësim nga ana e tyre që kanë paraqitur tek ne, jemi në kontakt dhe e ndjekim vazhdimisht situatën, si dhe kushtet janë normale pa ndonjë problem të posaçëm.
Deri më sot nuk kemi pasur biseda për dislokim, por kemi biseduar për decentralizim më të madh të ofrimit të atij shërbimi për pacientët që shërbehen në atë institucion, mirëpo deri tani nuk ka konkluzion të qartë se si do të vazhdojë ai decentralizim”, thotë Qamil Kovaçi, drejtor i spitalit psikiatrik “Nënë Tereza”. /tesheshi.com/
