Kuvendi i Maqedonisë pritet të mbajë në orët e pasdites të dhjetën seancë konstitutive ku do të debatohet për zgjedhjen e kryetarit, zëvendëskryetarit, anëtarëve dhe zëvendësve të tyre të Komisionit për çështje të zgjedhjeve dhe emërimeve.
Në Komision, VMRO-DPMNE do të përfaqësohet me gjashtë anëtarë, LSDM do të ketë pesë, ndërsa BDI dhe BESA nga një anëtar.
Nga BDI si anëtar është përzgjedhur Xhevat Ademi, ndërsa nga Lëvizja BESA, Zeqirija Ibrahimi, nga VMRO-DPMNE, Ilija Dimovski, Antonio Milloshoski, Kërsto Mukoski, Daniella Rangellova, Dimitar Stevanaxhia dhe Bllagica Lasovska, nga LSDM Goran Misovski, Damjan Mançevski, Petre Shilegov, Muhamed Zeqiri dhe Ivana Tufegxhiq.
Kujtojmë se seanca konstituive kuvendore filloi më 30 dhjetor të vitit 2016 por u ndërpre, për shkak se nuk u sigurua shumicë parlamentare për votimin e pikave të rendit ditës.
Në rend dite të seancës së sotshme është edhe përzgjedhja e kryetarit të Kuvendit.
Për momentin është VMRO-DPMNE ajo e cila ka bllokuar Kuvendin me fjalime dhe replika ndërmjet deputetëve të saj, vetëm e vetëm të mos lejojë që të kalohet në pikat kryesore të rendit ditës.
Ata kërkojnë ose tërheqje të Platformës së Tiranës dhe formimin e qeverisë së re, ose zgjedhje të reja parlamentare.
Të shohim sot nëse VMRO do të lëshon pe dhe definitivisht të zhbllokohet Kuvendi. M.Krasniqi
