Prindër e arsimtarë në Maqedoni, sidomos nga pjesa shqiptare, po vënë alarmin se fëmijët po iu “ikin duarsh”, për shkak se pas mësimit vrapin e mbajnë tek bastoret apo kazinotë. Këto të fundit janë shtuar së tepërmi në qytetet e Maqedonisë.
Qytetarët thonë se gjendja e rënduar ekonomike e sociale ka bërë që ky biznes të lulëzojë.
“Ku ka vende të fukarallëkut, aty ka bastore dha kazino, për atë shkak edhe hapen ato. Sepse duan të fitojnë shpejt dhe në rrugën më të shkurtër”, tha një qytetar.
Në Kumanovë, po përgatitet të hapet edhe një kazino tek tregu i gjelbër, në bulevardin kryesor të qytetit, pak metra larg Gjimnazit “Sami Frashëri” dhe po aq afër shkollës fillore “Bajram Shabani”. Me që ligji aktual nuk i kufizon në lokacione, bastore e kazino ka gjithandej.
Kjo situatë ka bërë që Shoqata e Arsimtarëve të ndërmarrë një iniciativë për ndryshimin e ligjit për lojërat e fatit. Ata kërkojnë që ky aktivitet të zhvendoset në periferi ose në objektet hotelierike.
“Ne kemi menduar se kjo dukuri duhet të luftohet në mënyrë transparente, të mbështetemi të gjithë ne që ndërmorëm këtë iniciativë dhe të rregullohet njëherë e përgjithmonë që rinia jonë mos tu drejtohen dyerve të kazinove apo lojërave tjera të fatit, por t’u drejtohen klubeve sportive, bibliotekave dhe institucioneve tjera edukativo-arsimore, për të cilat kanë shumë nevojë”, u shpreh Etem Xheladini nga Shoqata e Arsimtarëve.
Sipas tij, iniciativës për të ndryshuar këtë ligj i është bashkangjitur edhe shoqëria civile, dhe një kërkesë më shkrim e kanë drejtuar tek Kuvendi tek Qeveria, përkatësisht te Ministria e Financave, e cila jep licencën e këtyre bizneseve. Xheladini thotë se ligji aktual nuk është në favor të shoqërisë së shëndoshë, por stimulon hapjet e pikave të reja meqë përfitimet janë marramendëse në dëm të xhepave të siç i quan të leckosura të qytetarëve.
Ligji për lojrat e fatit në Maqedoni:
“Sipas Nenit 58, licenca për organizimin e lojërave të fatit në kazino jepet për periudhë kohore prej gjashtë vjetësh dhe për marrjen e kësaj licence paguhet kompensim në shumë prej 600.000 eurove.
Kurse neni 73 thotë se për organizimin e lojërave të fatit në bastoret sportive, licencë për periudhën tre vjeçare mund të merr çdo firmë afariste, e cila paguan shumën prej 500.000 eurove.”
Sipas të dhënave të Drejtorisë për të Hyra Publike, për vitin e kaluar vetëm një kompani e bastoreve sportive ka deklaruar fitim mbi 50 milion euro.
Miradie Hasani – /tesheshi.com/
