Nga Miradie Hasani
Diskriminimi në administratën shtetërore maqedonase për punonjësit shqiptarë e ka një rast shembull, atë të Ministrisë së Kulturës.
Shqiptarët e punësuar aty prej 10 vitesh kanë mbetur akoma vetëm bashkëpunëtorë. Asnjë hap në karrierë dhe pse kanë treguar se kanë aftësi të ecin më tej.
Bëhet fjalë për 50 të punësuar shqiptarë në Ministrinë e Kulturës të Maqedonisë, të cilët siç thonë, kanë ngelur në vend dhe asnjëherë nuk janë avancuar nëpër sektorë udhëheqës.
Afet Jashari ka 10 vjet që është i punësuar në Ministrinë e Kulturës, në sektorin për trashëgimi kulturore. Ai ankohet se 
shqiptarët e punësuar në këtë institucion, nuk janë avancuar asnjëherë nëpër postet drejtuese.
Të gjithë u punësuan përmes Sekretariatit për implementimin e Marrëveshjes së Ohrit, kurse Jashari thotë se, ashtu siç u pranuan në punë, si referent të ri, apo bashkëpunëtor, ashtu edhe kanë mbetur me vite, ndonëse kanë plotësuar kushtet për t’u avancuar në kualifikimin e tyre.
Deri tani në postin më të lartë ka qenë sekretari shtetëror i ministrisë së Kulturës, ndërsa punëtorët që janë me përvojë 10 vjet kërkojnë që shqiptarët të avancohen brenda këtij institucioni dhe të marrin poste më të larta. Ai thotë se me anë të nënshkrimeve të mbledhura nga ministria e kaluar kishin kërkuar avancimin e shqiptarëve, megjithatë kërkesa e tyre kishte hasur në vesh të shurdhër.
“Këto 10 vjet sa janë kolegët shqiptarë brenda institucionit të cilët shumica e tyre plotësojnë kushtet që të avancohen brenda sektorëve sa ka Ministria e Kulturës, një gjë e tillë nuk ka ndodhur nga udhëheqësit e kaluar, ndërsa pala tjetër ka pasur avancime nëpër sektorë të ndryshëm.
Ne me kolegët shqiptarë brenda Ministrisë së Kulturës, biseduam dhe e pamë të arsyeshme që Qeverisë së tashme t’ia bëjmë me dije se brenda këtij institucioni ka shqiptarë profesionist që dinë të bëjnë punën e tyre dhe meritojmë të jenë në pozita më të larta brenda institucionit”.
Ministria e Kulturës ktheu përgjigje duke premtuar se të punësuarit do të kenë vlerësim në detyra në bazë të arritjeve të tyre, ndërsa programi i ri i kësaj ministrie do të përfshijë kapacitetin e të punësuarve në aspekt të avancimit të tyre.
“Ne jemi për avancim, mirëpo kjo nuk duhet të jetë sipas ndonjë çelësi, por në bazë të arritjeve. Besoj se të punësuarit do të vlerësohen në bazë të kapacitetit të tyre në programin tonë ambicioz dhe se ne me kënaqësi do t’i avancojmë për arritjet e tyre”, thuhet në kumtesën e Ministrisë së Kulturës./tesheshi.com/
