Me gjasë, për ligjin e gjuhëve në Maqedoni, ose ndryshe ligjin që e bën shqipen gjuhë të dytë zyrtare, miratuar ditë më parë në Kuvend e që pret vetëm dekretimin e Presidentit Ivanov, do të shprehet dhe Gjykata Kushtetuese e Maqedonisë. Kjo pasi një prej deputetëve të VMRO-së, kundërshtare e rreptë e ligjit, do e çojë atë në Kushtetuese.
Ky është Ilija Dimovski, i cili e ka këtë inisiativë personale, edhe pse në sinkron me qëndrimin e partisë së tij. Ligji konsiderohet si anti-kushtetuese, e për këtë arsye, Dimovski mendon se fjalën për shqipen duhet ta thotë instanca më e lartë gjyqësore që mbron Kushtetutën.
“Iniciativa ime deri tek gjykata Kushtetuese nuk është në drejtim që t’i merren ose t’u shkurtohen mundësitë e bashkëqytetarëve tanë shqiptarë, turq, vlleh ose boshnjakë, që ta përdorin gjuhën e tyre gjatë komunikimit zyrtar me organet shtetërore”, ka thënë Dimovski, porse shumica parlamentare sipas tij, ka marrë vendime të njëanshme për miratimin e ligjeve, pa përfshirjen e opozitës.
Nga ana tjetër, në pritje është verdikti që do të japë presidenti Ivanov, që po ashtu si VMRO, ligjin e gjuhëve e ka quajtur anti-kushtetues, ama kjo para disa muajsh, kur në pushtet ishte ende VMRO-ja dhe partneri i tij politik, Gruevski. Deri tani ka vetëm heshtje prej tij. /tesheshi.com/
