Atmosferë e tensionuar mbizotëroi në komisionin për çështje evropiane të Kuvendit të Maqedonisë ku po diskutohej propozim ligji për gjuhën shqipe.
Gjithçka nisi kur deputetët e Lëvizjes BESA protestuan pse nuk iu dha fjala që ta mbrojnë amendamentin e propozuar për ndryshimin e emrit të Ligjit për përdorimin e gjuhëve. Kërkesa e tyre ishte që ky ligj të quhet Ligji për përdorimin e gjuhës shqipe, kërkesë kjo që u refuzua nga ministri i drejtësisë Bylent Saliu. Ata në shenjë revolte filluan të trokasin.
Ata u revoltuan pasi kryetari i komisionit, Artan Grubi i BDI-së, nuk ua dha fjalën, duke thënë se kështu ai nuk lejoi debat real. Sipas tyre, kjo i shërbeu dështimit të zyrtarizmit të gjuhës shqipe.
Lëvizja Besa, qasjen e BDI-së e quan qasje të njëjtë me atë të VMRO-DPMNE-së e cila bllokonte me replika dhe kundër-replika konstituimin e Kuvendit dhe votimin e leximit të parë të propozim-ligjit për përdorimin e gjuhëve. Besa nuk përjashton mundësinë për bojkotimin e punës së komisionit.
“Bashkimi Demokratik për Integrim dhe Artan Grubi, kanë manipuluar që nga viti 2001 e këndej me këtë çështje, kur në vitin 2008 ata sollën një ligj me të cilin tërë kohën e proklamojnë gjuhën shqipe sikur zyrtare, por na doli se është një ligj për përkthimin e gjuhës shqipe si dhe ka pasur ndryshime kozmetike ndaj këtij ligji dhe tani vazhdon manipulimi se ata e zyrtarizojnë gjuhën shqipe”, tha Fadil Zendeli, deputet i Lëvizjes Besa.
Artan Grubi ndëpreu seancën ndërsa tha se ajo do të vazhdojë më 25 dhjetor, kur duhet t’i jepet edhe një mundësi VMRO-DPMNE-së për pjesëmarrje në debat.
“Sot dita e dytë filloi dhe përfundoi, dhe do të vijoj me ditën e tretë dhe përfundimtare të debatit mbi amendamentet për këtë ligj për përdorim të gjuhëve, besoj se me 25 dhjetor. Arsyeja është që t’i japim edhe një mundësi opozitës që të vjen dhe t’i artikulojë amendamentet e saj dhe të ballafaqon argumentet mbi ligjin për përdorimin e gjuhëve”, u shpreh Grubi.
Në këtë ditë duhet të përfundojë debati për amendamentet e partive politike dhe leximin e dytë, i propozim ligjit për gjuhët. Për këtë partitë VMRO-DPMNE , LSDM dhe BESA kanë propozuar gjithsej 90 amendamente.
Miradie Hasani – /tesheshi.com/
