Një sërë padish nga Prokurorja Speciale, Katica Janeva ndaj funksionarëve të lartë shtetërorë dhe aktivistëve partiakë. Në konferencën e mbajtur para disa minutave prokurorja Janeva me ekipin e saj sqaruan se kanë marrë të drejtën për aksionin me emrin simbolik “Titanik”. Pra bëhet fjalë për lëndën e parë që deri më tani ka hetuar prokuroria speciale, edhe atë për krimet në procesin zgjedhor.
Sipas prokurorisë, personat e dyshuar kanë kryer vepra penale duke kryer presione për të votuar, ndalesë votimi, dhënie të ryshfetit, shoqërim kriminal, shkelje e së drejtës zgjedhore, shkatërrimin e materialeve zgjedhore dhe keqpërdorimin e mjeteve për fushatën zgjedhore në vitin 2012.
Sipas ekipit të Janevës, konkretisht bëhet fjalë për ish-ministren e Punëve të Brendshme, Gordana Jankullovska dhe ministrin e Transportit dhe Lidhjeve, Mile Janakievskin të cilët me ndihmën e personave tjerë kanë krijuar grup për kryerjen e veprës penale që të mundësojnë fitoren e VMRO-DPMNE-së.
Përveç tyre, Prokurorja Speciale në kuadër të aksionit “Titanik” sot ka hapur hetim edhe kundër anëtarëve të Komisionit Zgjedhor në Komunën e Çairit në bazë të dyshimit se kanë kryer vepër penale “Mashtrim zgjedhor” në zgjedhjet e vitit 2013. Sipas ndihmëseprokurores Janeva, Fatime Fetari, kjo vepër penale është kryer duke i ndryshuar rezultatet e votimeve.
Në kuadër të këtij dyshimi, Prokuroria ka dërguar fletarrestim për njërin nga anëtarët e këtij komisioni që i njëjti mos të ndikojë në dëshmitarët dhe bashkë-kryerësit e veprës.
Ndryshe, nga prokuroria njoftojnë se është hapur hetim edhe kundër pesë gjykatësve në Gjykatën Administrative të Shkupit dhe katër anëtarëve të Komisionit Shtetëror Zgjedhor (KSHZ) të vitit 2013 për veprën penale “Keqpërdorim të pozitës zyrtare dhe autorizimit në bazë të nenit 353 të Kodit Penal.
“Hetimi do të zgjerohet dhe asnjëri nga ata që ka vepruar në mënyrë kriminele nuk do t’i ik ballafaqimit me ligjin” tha mes tjerash Fetai. /tesheshi.com/
