Mensur Krasniqi
“Takime bosh” kanë filluar të duken ato mes përfaqësuesve të katër partive politike, nënshkruese të Marrëveshjes së Përzhinos dhe përfaqësuesve ndërkombëtarë, lidhur me reformat në mediat publike.
Në takimin e djeshëm në klubin e deputetëve në Shkup përveç ndërmjetësuesit belg, Piter Van Houte, si përforëcim për avancimin e kësaj çështje morën pjesë edhe ambasadori i SHBA-së dhe BE-së, Xhes Bejli dhe Aivo Orav.
Këta dy ua kanë bërë me dije partive politike që afati për marrëveshje lidhur me mediat është shkelur gjatë kohë, dhe prezenca e tyre në këtë takim nuk është e rastësishme.
Ndërkaq, para fillimit të takimit Van Houte tha se nuk është optimist por se shpreson që do të ketë përparim. Ndërsa pas mbarimit të bisedimeve të djeshme Vanhaute shkroi në tëiter një status në mënyrë sarkastike duke thënë se “Situata është e pashpresë. Por nuk është as serioze”, ndërsa më pas ka shtuar se “pas bisedimeve të gjata, është koha për gjëra kreative: gjumë. Bisedimet vazhdojnë nesër”.
Pika më e ndjeshme e bisedimeve në këto takime thuhet të jetë reformimi i servisit publik i cili duhet të shërbej si model për funksionimin e mediave komerciale si dhe ndërprerja e tërësishme e reklamave të qeverisë në mediat private.
Ndryshe çështja e mediave vlerësohet si një nga shtyllat kryesore të marrëveshjes politike veçanërisht në pjesën që ka të bëjë me krijimin e kushteve për organizimin e zgjedhjeve në një frymë demokratike.
Deri tani, LSDM përkrah njërin nga propozimet e ekspertit Van Houte për zgjidhjen e kësaj çështje, ndërsa VMRO-DPMNE nuk ka shfaqur gatishmëri për të pranuar asnjë nga propozimet e tij.
/tesheshi.com/
