Nga Mensur Krasniqi
Një skandal tjetër ka tronditur Maqedoninë. Pas hetimeve dhe me urdhër të Prokurorisë Publike, policia maqedonase gjatë ditës së djeshme ka arrestuar 8 të dyshuar për korrupsion, gjegjësisht kryerje të veprës penale “marrja e rryshfetit”.
Bëhet fjalë për 6 profesorë, një demonstrator dhe një drejtues bifeje(kafeneje) në kuadër të universitetit shtetëror “Shën Cirili dhe Metodi” në Shkup.
Sipas prokurorisë, këta persona dyshohen për më shumë vepra të cilat do të vërtetohen pas përfundimit të hetimit.
“Përveç parave, ekziston dyshim i bazueshëm se një pjesë e profesorëve kanë kërkuar edhe shërbime seksuale për të dhënë provimet”, thuhet në kumtesën e prokurorisë publike.
Nga prokuroria gjithashtu kanë njoftuar se një prej profesorëve është kapur në flagrancë duke marrë mito prej 1 mijë eurosh ndërsa për të tjerët ka prova të mbledhura prej më herët.
Sipas sociologut dhe profesor universitar, Ali Pajaziti korrupsioni është agjent kancerogjen antiarsimor dhe antisocial në përgjithësi, andaj mësimdhënësit e korruptuar duhet të përjashtohen përjetësisht nga vatrat e dijes.
“Personat që duhet të jenë model nuk guxojnë të bëjne veprime të këtilla joetike. Të gjithë studentët t’i denoncojnë rastet e tilla, përndryshe do t’ia pësojnë ata vetë dhe ne të gjithë. Edhe nepotizmi duhet të shpaloset gjithashtu. Nuk është normale që familjarë të një shtëpie të ligjërojnë në të njëjtën katedër”, deklaroi për portalin tesheshi.com, sociologu Ali Pajaziti.
Ai më tutje ka theksuar se njeriun nuk e bën diploma apo titulli me dy, tri shkronja njeri, por e bën ndjenja morale dhe ndërgjegjja.
“Ka mësimdhënës që kanë bagazh por vlera etike thuajse hiç s’kanë. Kriteri mbahet për hir të dijes e jo për hir të xhepit dhe klientelës”, ka shtuar Pajaziti.
Nga ana tjetër, profesori universitar dhe analist politik, Sefer Tahiri në rrjetin social facebook ka shkruar se ky aksion i policisë duhet të zgjerohet edhe në të gjitha universitetet ku ka dyshime për korrupsion.
“Ta luftojmë këtë të keqe, këtë gangrenë të shoqërisë!”, porositi Sefer Tahiri.
Ndryshe, portali tesheshi.com ka kontaktuar edhe zëdhënësin e Universitetit Shtetëror të Tetovës, Selam Sulejmanin për ta pyetur nëse raste ngjashme korruptive si kjo e fundit me profesorët e “Shën Cirili dhe Metodi” janë vërejtur edhe në USHT. Mirëpo ai ishte kategorik dhe konciz në qëndrimin e tij, se të tilla raste nuk ka pasur në USHT.
“Nëse organet e hetuesisë dhe drejtësisë vlerësojnë se ka dyshime për ndonjë nga profesorët e USHT-së se kanë kryer vepër penale të mitmarrjes atëherë do të kishin vepruar njëjtë si në “Shën Qirili dhe Metodi. Por tani për tani nuk ka ndonjë gjë të tillë”, deklaroi për portalin tesheshi.com, Selam Sulejmani. /tesheshi.com/
