Dy orë para se të përfundon procesi i rivotimit në vendvotimin 2011 të komunës së Tearcës në Tetovë, sipas përfaqësuesit të KSHZ-së, Husein Huseini deri në ora 17:00 kanë votuar 377 votues nga gjithsej 714 , pa paraqitur deri më tani asnjë problem.
“Procesi i votimit gjatë ditës së sotme ka shkuar shumë mirë, nuk është regjistruar asnjë problem i vogël, gjithçka ka qenë në rregull. Deri në ora 17:00 kanë dalë 377 votues, gjegjësisht 52.8 përqind e trupit votues në këtë vendvotim”, ka deklaruar Husein Huseini nga KSHZ.
Vendvotimi 2011 është vendimtar për ndryshimin e mandateve të VMRO-DPMNE-së dhe LSDM-së, me ç’rast kësaj të fundit i duhen 307 vota për t’ia marrë 1 deputet partisë së Gruevskit. Nëse ndodh kjo, rezultati do të barazohej në 50 me 50 deputetë.
Ky është vendvotimi i vetëm ku janë përsëritur zgjedhjet, pasi që Gjykata Kushtetuese ka pranuar ankesën e LSDM-së mbi parregullsi zgjedhore.
Sipas rezultateve të 11 dhjetorit, në këtë vendvotim kanë votuar 404 veta, ku 91 vota i ka marrë VMRO-DPMNE, 86 LSDM; BESA 65, PDSH 64, BDI 58 dhe Aleanca për Shqiptarët 25 vota.
Në parim nëse shikohet rezultati i 11 dhjetorit në këtë vendvotim nuk do të diskutohej për ndonjë ndryshim të madh të rezultatit, megjithatë duke pasur parasysh se shqiptarët armik të përbashkët e shohin rrëzimin e regjimit të VMRO-së dhe Gruevskit, sot vota për LSDM-në është një mundësi reale që të realizohet ky mision. Po nëse ia shtojmë këtu edhe afërsinë e LSDM-së me votuesin shqiptar, me ç‘rast në listat e kandidatëve për deputetë kishte vendosur dy shqiptarë(deputet tani të përzgjedhur), dhe arriti të fitojë mbi 70 mijë vota shqiptare, si dhe premtimet për dygjuhësinë në tërë territorin e Maqedonisë, është më se e besueshme se vota e shqiptarëve në Tearce mund të jetë pro LSDM-së.
M.Krasniqi – /tesheshi.com/
