VMRO-ja e Gruevskit po e përjeton si një “bombë”, të llojit tjetër nga ato të përgjimeve, vendimin e Gjykatës Administrative për ripërsëritje zgjedhjesh në Tearce; gjë që mund të çojë në humbjen e një mandati të kësaj partie, më pas barazimin me LSDM-në, dhe kështu duke e bërë të pamundur formimin e qeverisë së re. Anëtari i Bordit Ekzekutiv të VMRO-së, Nikolla Todorov, tha se gjykatës në fjalë i është bërë presion për këtë vendim, që sipas tij, është kundër vullnetit të popullit.
”Ky është skenar për të zbehur fitoren e VMRO-së dhe vullnetin e qytetarëve. Është e qartë se LSDM, mediumet e LSDM-së dhe të gjithë faktorët tjerë i kanë bërë presion Gjykatës Administrative dhe kjo do të ndikojë edhe në rezultat pasi ata do ta vjedhin votën e lirë. Kjo e zbeh idenë që në Maqedoni do të ketë zgjedhje të lira dhe demokratike” tha mes tjerash Todorov.
Por sipas simpatizantëve të LSDM-së të cilët kanë komentuar në rrjetet sociale facebook, kjo deklaratë e Todorovit dedikuar partisë së tyre më shumë i shkon përshtati partisë së tij, ngase nuk ishte LSDM-ja ajo parti e cila ka bërë presion ndaj KSHZ-së, por VMRO-ja së bashku me funksionarët e saj. Ndërsa LSDM ka shfrytëzuar të drejtën legjitime dhe përveç KSHZ-së ka ankimuar parregullsitë zgjedhore edhe në Gjykatën Administrative.
Kështu, nëse rivotohet në një vendvotim të komunës së Tearcës në Tetovë, ka gjasa që rezultati eventual pozitiv për LSDM-në në këtë vendvotim të sjellë edhe ndryshimin e rezultatit të përgjithshëm të deputetëve ndërmjet VMRO-LSDM-së. Pra VMRO e cila për momentin ka 51 deputetë, mund të mbtete vetëm me një deputet, i cili do t’i kalojë LSDM-së, me ç’rast do të barazohen mandatet, të dyja nga 50-të. M. Krasniqi -/tesheshi.com/
