Një gjykim i tipit teatral ndodhi në një seancë gjyqësore në Shkup, ku në bankën e të akuzuarve ndodhej ish-kryeministri Gruevski si organizator i protestave të dhunshme në Komunën Qendër para disa vitesh. Por jo gjithçka rrodhi si duhet. Ishte gjykatësja Tatjana Mihajlova aje që ndërpreu seancën pasi ndëshkoi dy “burrneshat”e Prokurorisë Speciale, Katica Janeva dhe Fatime Fetai, me nga 2.000 euro gjobë për shkak të mosrespektimit elementar të gjykatës.
Fetai reagoi ashpër duke thënë: “Nuk kam ardhur gjykatëse t’ju shoh se sa e bukur jeni. Ju në procesverbalin e seancës së kaluar keni bërë një falsifikim intelektual. E kërkuam incizimin audiovizual që të ngrejmë procedurë penale kundër jush, pasi që ju në procesverbalin e datës 16.12.2016 në mënyrë të rrejshme keni përmendur se opinioni është përjashtuar nga gjykata vetëm në pjesën ku dëgjohen incizimet nga bisedat e përgjuara, ndërsa në fakt gazetarët janë përjashtuar dhe kur unë si prokuror i PSP-së kam deklaruar për argumentet e mia për përdorimin e bombave si dëshmi. Do t`i thërras gazetarët si dëshmitar në procedurën penale që do të ngritet kundër jush”.
Dhe pas përfundimit të seancës, në një deklaratë për media, Fetai ka zbuluar se bëhet për katër gjoba ndaj saj dhe Katica Janevës, që tha se do i paguajnë.
“Që të dyja ishim ndëshkuar me nga 2000 euro, që do të thotë se bëhet fjalë për katër dënime të veçanta. Me kënaqësinë më të madhe do ta paguajmë. Kryesorja drejtësia le të dalë në shesh. Unë ia thash gjithçka që kisha për t’i thënë, ndonëse mu mohua proceduralisht një gjë e tillë”, deklaroi prokurorja shqiptare.
Ndërsa sipas avokatit të Gruevskit, Nikolla Dodevski, sjellja e prokuroreve të Speciales në seancë ka qenë një skenar i përgatitur për të bërë presion mbi gjykatësen. Sipas tij, sado që të jetë e qetë gjykatësja në raste të tilla kur i bëhet presion, gjobat janë të paevitueshme.
Ai shtoi se prokuroret Fetai dhe Janeva kanë penguar procedurën me vërejtje që nuk kanë pasur bazë juridike.
Kujtojmë se më 15 shtator të vitit të kaluar, Prokuroria Speciale përveç Gruevskit ka ngritur aktakuzë edhe ndaj ish-ministrit të Transportit dhe Lidhjeve, Mile Janakieski dhe tre personave të tjerë të cilët akuzohen për urdhërimin e dhunës në Komunën Qendër. Gjithashtu, padi është ngritur edhe për 9 persona të tjerë, po për këtë ngjarje. /tesheshi.com/
