Lëvizja BESA do të ketë përfaqësuesin e saj në Komisionin Shtetëror Zgjedhor të Maqedonisë. Kjo falë ndryshimit të miratuar me 77 vota pro, përfshirë edhe opozitën, të nenit që ka të bëjë me përbërjen e anëtarësisë së këtij institucioni dhe mandatin e tyre.
Katër partitë më të mëdha parlamentare, në koordinim, kanë rënë dakord që përbërja e anëtarëve partiakë në KSHZ, të paktën 30 ditë para zgjedhjeve, të rregullohet në përputhje me rezultatet që dalin nga zgjedhjet parlamentare.
Në këtë mënyrë emri që do të propozohet nga BESA pritet të zëvendësojë atë të PDSH-së, Bedredin Ibraimi.
Lëvizja Besa referuar rezultateve të fundit të zgjedhjeve parlamentare të 11 dhjetorit të vitit 2016, është partia e katërt në radhitje dhe bazuar në Kodin Zgjedhor, si parti opozitare, i takon një përfaqësues në Komisionin Shtetëror Zgjedhor.
Me ndryshimet dhe plotësimet, parashihet që 30 ditë para zgjedhjeve të reflektohen ndryshimet bazuar në zgjedhjet e fundit parlamentare.
“Ajo që është detyrim i Parlamentit dhe të gjithë partive parlamentare, është që para zgjedhjeve, ne ta kemi një anëtarë në KSHZ”, deklaroi Fadil Zendeli, BESA.
Nga BESA thonë se kanë shqyrtuar disa emra të mundshëm për anëtar në KSHZ, por nuk ka një vendim përfundimtar.
Bedredin Ibraimi ka qenë anëtar i këtij komisioni për disa mandate gjatë kohës kur PDSH-ja ka qenë partia e dytë më e madhe opozitare. KSHZ-ja ka gjithsej nëntë anëtarë, tre të pavarur, tre të pozitës dhe tre të opozitës. /tesheshi.com/
