Mbi 20.000 nxënës të klasës së parë do të ulen në bankat e shkollës, në Maqedoni, në vitin e ri mësimor 2017-2018, i cili me vendim të Ministrisë së Arsimit dhe Shkencës do të fillojë më 4 shtator.
Sipas të dhënave të Ministrisë së Arsimit dhe Shkencës, numri i nxënësve të regjistruar në klasën e parë arrin 20.437.
Në Shkup nga 10 komuna deri tani janë paraqitur 6.159 nxënës në klasën e parë.
Në shkollat e mesme janë regjistruar gjithsej 17.131 nxënës. Në të dy afatet e regjistrimit, në shkollat e mesme të Shkupit janë regjistruar 6.496 nxënës, ndërsa në komunat e tjera numri arrin në 10.635.
Interes më të madh ka pasur për arsimin profesional ku janë regjistruar 9.983 nxënës, ndërsa për arsimin e përgjithshëm 6.703.
Në gjimnazet e Shkupit janë regjistruar 2.768, ndërsa në shkollat profesionale 3.407 nxënës.
Në arsimin e gjimnazeve në komunat e tjera janë regjistruar 3.935 nxënës, ndërsa në shkollat profesionale 6.576 nxënës.
Në shkollat artistike janë regjistruar gjithsej 224 nxënës, nga të cilët 148 në Shkup. Ndërsa në gjimnazin e sportit 221 nxënës, nga të cilët në Shkup 173. /tesheshi.com/
