Partia opozitare maqedonase, LSDM në krye me Zoran Zaev sot përmes një kumtese me shkrim ka akuzuar ish-kryeministrin dhe liderin e VMRO-DPMNE-së, Nikolla Gruevskin, se ky i fundit e ka pranuar ndryshimin e emrit të shtetit. Në kumtesë thuhet se në vitin 2008, Gruevski si kryeministër është pajtuar me emrin Republika e Maqedonisë (Shkup).
“Edhe vetë Antonio Milloshovski nga VMROD-PMNE-ja, si ministër i Punëve të Jashtme, në një letër të dërguar Sekretarit të Përgjithshëm të OKB-së, Ban Ki Mun, pranoi se e kanë pranuar propozimin për ndryshimin e emrit në ‘Republika e Maqedonisë (Shkup)’, por këtë propozim e ka refuzuar Greqia”, theksohet në deklaratë.
LSDM-ja thekson se kjo është konfirmuar edhe në dokumentet që i publikoi “Uikiliks”, si dhe në bisedimet e përgjuara nga projekti “E vërteta për Maqedoninë”.
Nga ana tjetër VMRO-DPMNE, vlerëson se akuzat e LSDM-së, se Gruevski e ka dakorduar dhe pranuar ndryshim të emrit të Republikës së Maqedonisë janë tregues se ata janë të obsesionuar dhe frustruar nga ai. Nga partia theksojnë se as ai, e as partia nuk kanë tregtuar, e as madje nuk do të tregtojnë me emrin kushtetues të vendit.
M.Krasniqi – /tesheshi.com/
