Zeqirija Ibrahimi, një ndër figurat qendrore të Levizjes BESA në Maqedoni, e njëherësh kandidat për deputet i kësaj force, ka bërë publike në FB ndihmën modeste të një të panjohuri për BESËN, shoqëruar me një shënim me dorë. Siç e sqaron dhe Ibrahimi në një status të tij, ai nuk e njeh fare dhuruesin, porse gjesti i tij, pavarësisht sasisë së dhuruar, përbën një akt të madh.
“Mbrëmë ndonjë njeri i panjohur ia kishte dhënë një shokut të nipit tim një zarf dhe aty brenda kishte qenë ky shënim. Pasi e hapa dhe e lexova, u emocionova shumë.
Dikush ka ndarë nga buxheti i tij 200 denarë dhe ashtu ka vendosur ta ndihmojë kauzën tonë.
Unë nuk kam asnjë koment për këtë gjest, thjesht jam stepur, por vetëm dua të lutem siç u lut Pejgamberi jonë – Muhamedi a.s., kur dikush shkoi të dhurojë sadaka vetëm një dirhem dhe ai u lut më shumë se për të gjithë që kishin dhuruar mijëra dirhemë.
Ky i ka dërguar 200 denarë në stilin e milingonës që me një kovë mize ta shuajë zjarrin e Ibrahimit. Me rëndësi është të dëshmohet sot se në cilën anë jemi.
Zoti e shtoftë pasurinë tënde, i nderuar që nuk të njoh, dhe inshaAllah Zoti e bën sebep sakrificën tënde të madhe që kjo kauzë të ketë sukses”, shkruan Zeqirija Ibrahimi, duke publikuar dhe zarfin së bashku me shumën, si dhe shënimin përkatës të dhuruesit. /tesheshi.com/
