Nga Mensur Krasniqi
Si duket ende nuk është kuptuar esenca dhe burimi i krijimit të krizës politike në Maqedoni. Kjo situatë sipas ish-diplomatit maqedonas Nikolla Dimitrov është si pasojë e teorisë së bashkimit të një etnikumi kundër një etnikumi tjetër dhe anasjelltas. Andaj sipas tij për dalje nga kjo krizë e thellë politike nuk është e nevojshme që të bashkohen shqiptarët kundër maqedonasve dhe bashkimi i maqedonasve kundër shqiptarëve, por përpjekja e tyre e përbashkët për ta luftuar korrupsionin dhe çlirimin e institucioneve të robëruara dhe ndikuara nga politika, diçka që pamundësojnë sundimin e ligjit.
“Kriza në Maqedoni në esencë është krizë e institucioneve të robëruara që nuk mund të menaxhojnë me indikacionet dhe dyshimet serioze për krim, korrupsion dhe keqpërdorime, krizë e mos ndëshkueshmërisë në vendin ku sundon lideri dhe jo ligji.
Në këtë kuptim, për dalje nga kriza, Maqedonisë i duhet një qeveri që do t`i mundësoje punë të pandërprerë PSP-së dhe do ta ktheje besimin në institucionet dhe ligjet. Çështjet etnike nuk janë në mesin e bartësve të krizës e cila qartas ka treguar se të gjithë qytetarët janë në anijen e njëjtë. Nëse i vendoset aksenti agjendave etnike politike në këtë moment, ekziston rreziku që të turbullohet uji në det në drejtimin që do ta humbas kompasin dhe qëllimin bazë-përgjegjësinë. Maqedonisë nuk i duhet bashkim i maqedonasve kundër shqiptarëve, ose i shqiptarëve kundër maqedonasve, pasi që në një kontekst të tillë nuk e kemi Maqedoninë”, shkroi Nikolla Dimitrov në llogarinë e tij në Facebook.
Ndryshe, kriza politike në Maqedoni vazhdon të vijojë edhe pas zgjedhjeve të parakohshme parlamentare, pasi që si fituese të këtyre zgjedhjeve, ndonëse me mandate thuajse të përgjysmuara ishin pikërisht partitë të cilët e sollën vendin në një krizë të tillë.
Kështu që edhe 4 javë pas mbajtjes së zgjedhjeve asnjëra nga partitë politike, lëre që nuk kanë dalur me qëndrime zyrtare se cili do jetë formacioni i mundshëm për formimin e qeverisë, por se asnjë indikacion i vogël nuk shihet në këtë drejtim.
Ndërsa sipas rezultateve të zgjedhjeve të 11 dhjetorit, VMRO ka fituar 51 deputetë, LSDM 49, BDI 10, Lëvizja BESA 5, Aleanca për Shqiptarët 3 dhe PDSH 2 deputetë. /tesheshi.com/
