Mensur Krasniqi
Dështimi i koalicionit ndërmjet dy partnerëve të vjetër VMRO-BDI për formimin e qeverisë në Maqedoni, ka bërë që të intensifikohen takimet ndërmjet LSDM-së si parti e dytë fituese e zgjedhjeve në bllokun politik maqedonas dhe BDI-së.
Nënkryetari i kësaj të fundit dhe njëherësh kryetar i komunës së Gostivarit, Nezvat Bejta në një deklaratë për media ka bërë të ditur se partia e tyre dhe LSDM si parti e dytë fituese e zgjedhjeve, edhe sot vijuan konsultimet brenda-partiake për konkretizimin e qëndrimeve rreth formimit të qeverisë së re. Sipas tij, qytetarët së shpejti do të informohen për vendimin përfundimtar të BDI-së lidhur me negociatat me social-demokratët.
Nga partia e Ahmetit edhe një herë përsëritën qëndrimin se për shqiptarët më e rëndësishme është përmbajtja e marrëveshjes sesa forma e saj, që nënkupton sigurimin e firmave të deputetëve për mandatarin e ri.
Ndërkohë, të enjten Shkupin e viziton dhe komisioneri Hahn, njeriu që është angazhuar rregullisht për të zgjidhur krizat e politikës maqedonase. Ky fakt u përmend dhe në deklarimet e z.Bejta.
“Jemi të angazhuar që të vihet në funksion Kuvendi i Republikës së Maqedonisë dhe sa më shpejt të formohet qeveria. Ne jemi në zhvillim të bisedimeve dhe besoj se shumë shpejtë do jeni të informuar për gjithçka. Zoti Hahn ka punë me kryetarin, Ali Ahmetin, ndërsa ne e kemi për detyrë si grup pune të informojmë kryesinë e BDI-së dhe kryetarin për të gjitha bisedat që i kemi zhvilluar me grupin e punës të socialdemokratëve “, deklaroi Nevzat Bejta, numri 2 i i partisë së Ali Ahmetit.
Ndërkohë, nga LSDM-ja nuk japin detaje për negociatat. Por deputeti i tyre shqiptar, Muhamed Zekiri, në rrjetin social facebook ka paralajmëruar formimin e qeverisë së re, e cila do të ofrojë drejtësi për të gjithë qytetarët e saj. Ndërsa sipas tij, qeverisë së re sherrin do t’ia sheh vetëm kreu i VMRO-së, Nikolla Gruevski së bashku me familjen e tij.
“Qeveri dhe drejtësi do të ketë. Probleme do të kenë vetëm lideri i VMRO-së, Nikolla Gruevski dhe familja e tij”, ka shkruar ai.
Liderët e gjitha partive parlamentare politike gjatë së enjtjes pritet t’i takojë edhe Komisioneri për Zgjerim, Johanes Hahn. Këtë e ka bërë të ditur zëdhënësja e Komisionit Evropian, Maja Kocijançiq e cila ka njoftuar se ngjarja kryesore për të cilën Hahn do të vijë në Maqedoni është takimi i ministrave të Jashtëm dhe Energjetikës nga gjashtë shtetet e Ballkanit, Maqedonia, Kosova, Serbia, Shqipëria, Bosnja Hercegovina dhe Mali i Zi.
Ajo tha se në takimin ministror do të bisedohet për avancimin e tregut të energjisë elektrike në Ballkan, ndërsa më pas pohoi se takimi me liderët politik në Maqedoni do të jetë në agjendën e Hanit.
“Komisioneri Johanes Hahn të enjten do të jetë në Shkup më 8 shkurt në takimin e ministrave për punë të jashtme dhe energjetikë të gjashtë vendeve të Ballkanit Perëndimor. Pjesëmarrësit do të shënojnë përparimin e arritur në sektorin energjetik dhe do të bisedojnë për masat për avancimi e tregut rajonal të energjisë elektrike. Po ashtu, do të bisedohet për përgatitjen e Samitit Ballkanit, që në qershor do të mbahet në Tërst, Itali. Hahn po ashtu do të ketë takime bilaterale me përfaqësuesit e partive politike të vendit nikoqir”, ka thënë zëdhënësja e KE-së, Maja Kocijançiq.
Por Hahn vjen në Maqedoni në një kohë kur janë bllokuar bisedimet për formimin e qeverisë, pas zgjedhjeve të 11 dhjetorit.
Në disa raste, Komisioni Evropian ka kërkuar formimin e qeverisë sa më e zgjeruar që është e mundur me qëllim zbatimin e reformave të Pribesë, Marrëveshjes së Përzhinos si dhe zgjidhjen e çështjeve bilateral. /tesheshi.com/
