Të gjitha institucionet shëndetësore në Maqedoni kanë borxhe. Kjo u bë e ditur nga ministri i shëndetësisë, Arben Taravari, në një deklaratë për media gjatë prezantimit të vendosjes së 25 tabelave në gjuhën maqedonase, shqipe dhe angleze para institucioneve publike shëndetësore në qarkun e Qendrës klinike “Nëna Terezë” në Shkup.
Sipas tij, përgjegjës për këtë situatë janë drejtorët e mëparshëm të qeverisë së kaluar.
“Shpresoj që drejtorët e rinj nuk do të bëjnë gabime të tilla dhe rregullisht do t’i paguajnë borxhet, që i kanë klinikave”, tha Taravari.
Të njëjtën gjë ka deklaruar edhe drejtoresha e Institucionit publik nga fusha e shëndetësisë për nevojat e IPSH Klinikat universitare, Enti dhe Qendra urgjente-Shkup, Shkodrane Dardhishta.
“Borxhet e klinikave janë të mbartura nga e kaluar dhe ne po përpiqemi së bashku me ministrin e Shëndetësisë dhe me drejtorët e rinj të klinikave të gjejmë zgjidhje për problemin”, ka thënë Shkodrane Dardhishta. /tesheshi.com/
