Talat Xhaferi mori këtë të hënë detyrën e kryeministrit të Maqedonisë së Veriut në një mandat teknik, duke thënë se fokusi dhe angazhimi i tij në qeveri do të jetë kontrolli i organizimit dhe angazhimit të të gjitha trupave punuese.
Ai mori detyrën nga Dimitar Kovaçevski.
“Ditën e parë do të kontrolloj organizimin dhe funksionimin dhe më pas do të përcaktoj të gjitha organet punuese”, tha Xhaferi.
Kovaçevski tha se detyra kryesore e qeverisë teknike është organizimi dhe zhvillimi i zgjedhjeve presidenciale dhe parlamentare të lira, demokratike dhe të ndershme.
“Të gjitha politikat e nisura duhet të zbatohen plotësisht dhe në vazhdimësi. Unë shoh përkushtimin në punë, përqendrimin e të gjithëve në qeveri dhe në këtë drejtim besoj se puna do të jetë në nivelin më të lartë. I bëj thirrje qeverisë dhe të gjithëve në të, pavarësisht nga përkatësia partiake, të punojnë në interes të qytetarëve, ekonomisë, sigurisë dhe stabilitetit”, tha Kovaçevski.
Talat Xhaferi është shqiptari i parë që mban postin e kryeministrit të Maqedonisë së Veriut. Ai bëri betimin të premten, pas dorëheqjes së qeverisë së mëparshme të udhëhequr nga Dimitar Kovaçevski.
Partitë parlamentare në Kuvendin e Maqedonisë së Veriut në fillim të dhjetorit ranë dakord që zgjedhjet parlamentare të mbahen më 8 maj të këtij viti, së bashku me raundin e dytë të zgjedhjeve presidenciale, ndërsa raundi i parë i zgjedhjeve për president do jetë më 24 prill.
Kovaçevski më pas tha se qeveria teknike do të formohet 100 ditë para zgjedhjeve ose më 28 janar dhe se do të respektohet marrëveshja e mëparshme që kryeministri të jetë nga partia më me ndikim të shqiptarëve, BDI – Bashkimi Demokratik për Integrim.
Sipas datave të dakorduara, fushata parazgjedhore në Maqedoninë e Veriut do të fillojë më 4 prill, ndërsa zgjedhjet do të shpallen në fund të shkurtit. /tesheshi.com/
