Pak ditë pas zgjedhjes me gjak kryetar Kuvendi i Maqedonisë, shqiptarit Talat Xhaferi i janë hapur dyert e Brukselit, ku është takuar me eurokomisarin Johanes Hahn. Mesazhi ka qenë shumë i qartë: BE e njeh dhe përkrah kryetarin e ri dhe tashmë pret krijimin e qeverisë së re.
“Dhuna në Kuvend është e papranueshme. Kuvendit duhet t’i mundësohet të punojë dhe të arrijë deri te institucionet. Fokusi duhet tash të vendoset në formimin e qeverisë”, tha Mihael Karnitshnig, shefi i kabinetit të Johanes Hahn.
Këtë e paralajmëroi dhe vetë Xhaferi kur tha se presidenti Ivanov ka afat prej 10 ditësh për ta dorëzuar mandatin; dhe sipas tij, nëse ai nuk e ndërmerr një hap të tillë, atëherë parlamenti ka kompetencë ekskluzive për vendosjen e qeverisë së ardhshme.
Nga ana tjetër, një intensifikim i faktorit ndërkombëtar në mbështetje të shumicës së re parlamentare, fill pas zgjedhjes të kreut të ri të Kuvendit, shoqëruar fatkeqësisht dhe me dhunë, është parë dhe tek takimi mes kreu të BDI-së, Ali Ahmeti me me ambasadorin e BE-së, Samuel Zhbogar. Edhe nga ky takim ka dalë mesazhi paralajmërues se po troket qeveria e re, pavarësisht kundërshtive.
“Pas zgjedhjes së kryetarit të Kuvendit, duhet që Ivanov të dorëzojë mandatin shumicës së re reformuese parlamentare dhe mëpastaj të zgjidhet qeveria e re”, thuhet në deklaratën e shpërndarë pas takimit. /tesheshi.com/
