Përfundimisht, Lëvizja BESA dhe Aleanca për Shqiptarët do dalin si koalicion në raundin e dytë të zgjedhjeve vendore në Maqedoni, duke ia pamundësuar kështu BDI-së, që në një aleancë “të fshehtë” të saj me LSDM-në, të mund të marrë shumicën e komunave apo dhe disa komuna kryesore shqiptare, pra me votë maqedonase.
Kjo theksohet dhe në deklaratën përfundimtare të marrëveshjes mes Besës dhe Aleancës, ku ndër të tjera thuhet se: “Zotohemi se në raundin e dytë të zgjedhjeve lokale në Maqedoni do të bashkëpunojmë në interes të votuesit shqiptar në Maqedoni, duke i ofruar koalicion që e mundëson fuqizimin dhe maksimalizimin e votës shqiptare, por edhe që e pengon mundësinë që të tjerët t’i përcaktojnë fituesit e komunave shqiptare”.
E titulluar “Zotim”, marrëveshja mes këtyre dy forcave shqiptare, njëra e drejtuar nga Bilal Kasami dhe tjetra nga Zijadin Sela, përcillet më shumë si një kauzë kombëtare
“Lëvizja BESA dhe Aleanca për Shqiptarët i bëjnë thirrje gjithë popullatës shqiptare në Maqedoni, që në mënyrë sa më masovike të dalë në raundin e dytë të zgjedhjeve lokale, duke i mbështetur kandidatët për kryetarë komunash të këtij koalicioni. Në veçanti u bën thirrje aktivistëve të strukturave partiake, që të angazhohen nëpër shtabet përkatëse komunale e lokale, duke ndihmuar që shqiptarët të mund të shpëtojnë nga ky përfaqësim dhe degradim që i ndodhë kombit tonë në Maqedoni.
Ne e dëgjuam zërin e popullit shqiptar!”, përfundon deklarata e përbashkët mes dy forcave. /tesheshi.com/
