Vazhdojnë takimet e Bashkimit Demokratik për Integrim dhe Aleancës për Shqiptarët. Për dallim nga takimi i fundit që ishte në nivel të nënkryetarëve, kësaj radhe Ziadin Sela i priu delegacionit të Aleancës i shoqëruar nga Vesel Memedi dhe Gëzim Ostreni, ndërsa BDI u përfaqësua nga kreu i saj, Ali Ahmeti dhe deputeti Artan Grubi.
Në këto takime, sipas Ziadin Selës u biseduat rreth platformës së përbashkët të partive shqiptare në Maqedoni dhe mundësisë së jetësimit të asaj platforme. Ajo që është e rëndësishme nga ky takim, sipas Selës vlen të përmendet obligimi i partive nënshkruese të Deklaratës së Përbashkët që nëpërmjet përfaqësuesve të tyre të formojnë komisionin i cili do të përpilojë rregullore mbi funksionimin e tryezave të përbashkëta të partive politike shqiptare në të ardhmen.
“Në këtë takim u bisedua për Deklaratën e Përbashkët. Nga ky takim dolëm me dy konkluza. E para është që partitë politike nënshkruese të Deklaratës obligohen që në afat prej tre ditësh të emërojnë nga dy anëtarë të komisionit të cilët do të merren me krijimin e rregullores, pra me atë se si do të funksionojë në të ardhmen tryeza e partive politike parlamentare, ndërkaq e dyta ka qenë harmonizimi i qëndrimeve rreth ligjit, të cilin ne e kemi përgatitur”, kështu është shprehur Ziadin Sela nga Aleanca për Shqiptarët, pas takimit të cilin e kanë pasur me BDI-në.
Ai gjithashtu njoftoi opinionin se tanimë, në partneritet me BDI-në kanë përgatitur një ligj mbi përdorimin e gjuhës shqipe, duke hedhur poshtë propozimin e LSDM-së, e cila para disa ditësh ua kishte dorëzuar në formë të shkruar BDI-së një draft ligj tjetër për gjuhën shqipe, pa pasur nevojë të ndryshohet asnjë dispozitë kushtetuese.
“Tryeza e partive politike parlamentare shqiptare tanimë ka përgatitur ligjin për gjuhën shqipe, dhe nuk presim nga të tjerët të na ofrojnë një zgjidhje se si duhet trajtuar gjuha shqipe”, ka shtuar Sela.
Në fund Sela tha se pret që së shpejti të formohet rregullorja dhe në takimin e radhës të marrin pjesë të gjitha partitë politike parlamentare.
Nga ana tjetër, lideri i BDI-së nuk është ndalur për të dhënë deklaratë për media.
Ndonëse kësaj rradhe në takim ka qenë e ftuar edhe Lëvizja BESA, por nga kjo parti vazhdojnë të mbajnë qëndrimin se nuk kanë se çka të negociojnë më për platformën, sidomos me eksponentët e BDI-së.
“Pas interesimit të mediave se a do të marrë pjesë Lëvizja BESA në një takim që sot mbahet në Shkup, e njoftojmë opinionin se nuk ndjejmë asnjë detyrim të marrim pjesë në takime që nuk janë në frymë të Deklaratës së Përbashkët të Partive Shqiptare në Maqedoni, aq më shumë që për ne ky takim është bilateral ndërmjet dy partive shqiptare në Maqedoni”, thonë nga Lëvizja BESA.
Me këtë rast, Lëvizja BESA e rithekson qëndrimin e saj se, përkundër asaj se disa eksponentë politikë – në mënyrë infantile – i dolën zot autorësisë së Deklaratës(dedikuar BDI-së dhe Ali Ahmetit), megjithatë Lëvizja BESA nuk ka hequr dorë nga mbështetja e Deklaratës dhe kurdoherë që pikat e saj do të vijnë në Kuvendin e Republikës së Maqedonisë, deputetët e saj do t’i mbështesin ato pika. /tesheshi.com/
