Mensur Krasniqi
Në Maqedoni më asgjë nuk është e pabesueshme dhe e papritur. Këtë së fundmi e dëshmoi edhe vendimi i Gjykatës Kushtetuese për të pranuar propozim-ligjin e kryetarit të shtetit Gjorgji Ivanov, që të falë persona të dënuar për vepra penale si mashtrime zgjedhore, pedofili, trafikantë droge dhe vepra të tjera të rënda penale.
Ndaj këtij vendimi të Gjykatës Kushtetuese ka reaguar i tërë opinioni i gjërë në Maqedoni, duke filluar nga ekspertë juridik, gazetarë-opinionistë, organizata joqeveritare etj.
Eksperti për çështje juridike Bekim Kadriu e ka vlerësuar si skandaloz vendimin e Gjykatës Kushtetuese. Sipas tij vet vendimi i Gjykatës Kushtetuese për të shfuqizuar një ligj që nga viti 2009 e këndej nuk është në fuqi, është antikushtetues, pasi presidenti gëzon të drejtën e faljes së personave të dënuar në bazë të një ligji të miratuar nga Kuvendi.
“Mendimi im është që është shkelur Kushtetuta, dhe këtë e them duke u bazuar në pikërisht argumentet e Gjyaktës Kushtetuese. Së pari, Gjykata Kushtetuese pohon se me këtë ligj i ndërhyn në ingerencat e kryetarit të shtetit që nuk është e vërtet për shkak se Ligjin për falje e parasheh vet Kushtetuta. Kushtetuta kur parasheh mundësinë e kryetarit të bëj falje këtë e kushtëzon me një miratim të një Ligji të caktuar. Pra, kryetari bën falje në përputhje me ligjin që e miraton Kuvendi, ndërsa ky ligj me vota të kuvendit pushon që nga viti 2009. Tani Gjykata Kushtetuese në kundërshtim me vet Kushtetutën e shfuqizon këtë Ligj”, kështu analizoi eksperti Bekim Kadriu.
Derisa për gazetarin dhe opinionistin e njohur Nazim Rashidi vendimi i Gjykatës Kushtetuese më së paku është kundërthënës, ndërsa më së shumti është dashur ti shqetësojë gjykatësit që sollën një vendim që paragjykohet të jetë si i politizuar. Nga ana tjetër Rashidi befasohet edhe me rolin pasiv të partive politike shqiptare që më shumë merren me njëra tjetrën se sa të reagojnë për çështje kruciale të shtetit.
“Cënimi i sistemit të drejtësisë është legjitimimim i ngjalljes së frikës, dhe me këtë nuk mund të ketë pastaj asnjë reagim ose reagimet do mbesin pa efekt. Këtë gjë nuk duhet të lejojnë as shqiptarët dhe as maqedonasit. Por me gjithë çfarë ndodh partitë shqiptare duket se më shumë merren me njëra tjetrën. Rasti i Gjykatës Kushtetuese është çështje kruciale që prek liri themelore dhe të funksionimit të shtetit. Shoqëria shqiptare dhe partitë shqiptare do të duhet që për çështje që janë kaq thelbësore jo vetëm të jenë prezente por edhe të ofrojnë alternativa, zgjidhje. Këtë nuk e shohim të ndodhë me fuqinë e duhur. Ndërkohë reagimet nga shoqëria civile dhe media janë të konsiderueshme por nuk arrin dot të dëgjohet atje ku duhet”, deklaroi për portalin tesheshi.com, Nazim Rashidi.
Me këtë vendim sipas kryetarit të Qendrës për Demokraci dhe Zhvillim, Orhan Murtezani, përpos që Gjykata Kushtetuese edhe një herë e diskreditoi veten, Maqedonia tanimë përfundimisht është përshëndetur me demokracinë, sundimin e ligjit dhe shtetin e së drejtës.
“Sipas kësaj logjike, jashtë asaj që shihet qartë që ky vendim është sjellë me diktat politik, të sjellësh një vendim në bazë të të cilit Kryetari i shtetit të ketë të drejtë të falë pedofilë, manipulues të zgjedhjeve, trafikantë droge, ose shkurtë thënë kriminel të cilët duhet të ndëshkohen dhe privohen nga liria, edhe më tej e rrënon besimin e qytetarëve në sistemin e drejtësisë, dhe plotësisht i legjitimon akuzat për kapjen e tij të skajshme nga politika”, deklaroi për portalin tesheshi. com Orhan Murtezani, kryetar i Qendres per Demokraci dhe Zhvillim.
Dënim, mllef dhe revoltë për vendimin e marrë nga Gjykata Kushtetuese arriti edhe nga Ambasada e Parë për Fëmijë në Botë- “Megjashi”. Sipas drejtorit të “Megjashit”, Dragi Zmijanac kryetari i shtetit fitoi mundësinë për të falur edhe pedofilë. Nga ky moment e më tutje nëse rritet numri i pedofillisë, atëherë Ambasada e Parë për Fëmijë në Botë “Megjashi” do ti konsiderojë Presidentin e shtetit dhe Gjykatën Kushtetuese si bashkëfajtorë.
“I turpshëm dhe skandaloz është ky akt dhe nuk ndihmon aspak në parandalimin dhe mbrojtjen e fëmijëve nga keqpërdorimi seksual, gjë për të cilën zotohemi dhe për të cilën kemi arritur një progres të caktuar, por me këtë vendim bie në ujë gjithçka. Ky vendim e degradon skajshmërisht reputacionin e gjykatësve dhe të presidentit! Është e patolerueshme është që pedofilë të falen dhe çdo vendim i ardhshëm i presidentit bie drejtpërsëdrejti në nderin dhe ndërgjegjjen e tij. Nëse kihet parasysh se në numër më të madh, pedofilët e përsërisin aktin, nëse në të ardhmen përsëriten rastet e pedofilisë, atëherë Ambasada e Parë për Fëmijë në Botë MEGJASHI do t’i konsiderojë: Presidentin e shtetit dhe Gjykatën Kushtetuese si bashkëfajtorë”. është shprehur për portalin tesheshi.com, Dragi Zmijanac, drejtor i “Megjashit”.
/tesheshi.com/
