Pas një jave qëndrim prapa hekurave të burgut në Maqedoni, dje në orët e vona të natës është liruar nga paraburgimi shefi i protokollit në Ministrinë e Forcës dhe Sigurisë në qeverinë e Kosovës, Gafur Dugolli.
Pas daljes nga paraburgimi, ai është paraqitur pranë mediumeve për t’i falënderuar të gjithë ata që i dolën në mbështetje, duke filluar me ambasadorin e Kosovës në Shkup, Ylber Hysaj, qeverinë e Kosovës, e të gjithë spektrin politik shqiptar në Maqedoni.
“Falënderoj gjithë spektrin politik në Maqedoni, si ata në opozitë dhe në pozitë; gjithësecili e ka dhënë kontributin e vet sipas vendit që ka. Do të bëja apel që shqiptarët e Maqedonisë të jenë më të bashkuar se kurrë,” ka deklaruar Dugolli.
Ai ndër të tjera ka folur edhe për trajtimin e tij brenda burgut dhe kushtet e mjerueshme.
“Gardianët janë sjellë mirë, ndërsa kushtet e burgut janë të tmerrshme; as në stallë të kafshëve nuk është më keq,” ka shtuar i sapoliruari.
Dugolli u arrestua para një jave nga policia maqedonase në vendkalimin kufitar të Bllacës, pas një fletarresti ndërkombëtar të lëshuar nga Serbia.
Ky fletarrest është riaktivizuar së fundi nga autoritetet e Beogradit, gjegjësisht nga Prokuroria Serbe për krime lufte.
Në dosjen e akuzës, ku përfshihet edhe Dugolli, janë 23 komandantë dhe ish-pjesëtarë të UÇK-së, të Brigadës së 121 të udhëhequr nga Fatmir Limaj. Në aktakuzën serbe thuhet se grupi ka kryer krime lufte gjatë vitit 1998 kundër civilëve serb në rajonin e Kleçkës dhe të Qafës së Dules. /tesheshi.com/
