Gjigandët e futbollit gjerman nuk kanë ngurruar të nënshkruajnë një kontratë të re pesëvjeçare me portierin e tyre, Manuel Neuer-in.
Një nga lojtarët më të rëndësishëm te Bajerni i Mynihut, Neuer ka patur një ndikim të veçantë në sukseset e viteve të fundit.
I transferuar në vitin 2011 nga Shalke 04, Neuer ka qenë zgjedhja e padisktueshme e çdo trajneri që ka drejtuar Bajernin. Me të në portë, Bajerni mbushi boshllëkun që la largimi i Oliver Kahn-it në fund të dhjetëvjeçarit të shkuar.
Kontrata e re e mban atë në klub gjer në 30 qershor të vitit 2021, kur ai do të ketë mbushur 35 vjeç.
Pas një dominimi dyvjeçar të Borusias së Dortmundit, Bajerni e ka fituar tre herë rresht Bundesligën me Neuer-in në portë, e është sërish pranë fitimit të saj. Neuer ka fituar dy Kupa të Gjermanisë, me një tjetër finale që do të luhet në fund të majit. Ai ka ngritur një herë me bluzën e Bajernit dhe trofeun e Champions League-s, ndërsa klubi është ende në garë për të dalë fitues dhe në këtë sezon. Portieri i bavarezëve është shpallur dhe kampion bote me përfaqësuesen gjermane dy vite të shkuara.
Veç pritjeve të shkëlqyera, Neuer ka si specifikë të tij daljet nga zona e rreptësisë, duke u kthyer shpeshherë në mbrojtës. /tesheshi.com/
