Nëse nesër, tanket e trupat ruse derdhen në Balltik, forcat e NATO-s, më të pakta në armatime dhe njerëz do të mposhteshin për tre ditë. Ky është konkluzioni që mund të bëjë esëll shumëkënd nxjerrë nga analizimi i “lojë-luftërave” nga një organizatë e përbërë prej oficerëve e zyrtarëve të ushtrisë amerikane.
“Rezultatet e nxjerra nga analizimi i stërvitjeve ushtarake janë të dyfishta: me vendosjen aktuale, NATO nuk mund të mbrojë suksesshëm territorin e anëtarëve të saj më të ekspozuar”, thuhet në raportin e publikuar nga Rand Corp., që drejtoi kërkimin nisur nga manovrat stërvitore në Balltik.
Në një numër të madh pozicionesh lufte, të luajtura në tavolinë, përgjatë disa muajve midis viteve 2014-2015, forcat ruse trokisnin në dyert e kryeqytetit të Estonisë, Talin apo në kryeqytetin letonez, Riga brenda 36 deri në 60 orëve. Trupat amerikane dhe ato të vendeve balltike, së bashku me mbështetjen amerikane nga ajri, duken të paafta të ndalojnë avancimin e njësive të mekanizuara ruse dhe pësojnë humbje të rënda, sipas raportit.
Studimi argumenton se NATO mund të kapet duke dremitur nga një Rusi e rigjallëruar dhe e paparashikueshme, që ka nisur të rrisë kapacitetet e shpenzimet ushtarake të mbrojtjes pas aneksimit të gadishullit ukrainas të Krimesë dhe ndërhyrjes në mbështetje të sepaartistëve pro-rusë në krahinat lindore të Ukrainës. Në rast të një inkursioni të mundshëm rus në Balltik, Shtetet e Bashkuara dhe aleatët e saj kanë mungesa të numrit të mjaftueshëm të trupave, tankeve dhe mjeteve të blinduara për të ngadalësuar avancimin e rusëve, thuhet në raportin e Rand, që mban firmën e David Shlapak dhe Michael Johnson.
“Një humbje e tillë kaq e shpejtë do të linte disa mundësi të limituara për NATO-n, të gjitha të këqija”, thuhet në raport.
Shtetet e Bashkuara dhe aleatët e NATO-s mund të përpiqen të kundërsulmojnë pa llogaritur humbjet e rënda që kanë nga kjo taktikë, por kjo do të nxiste një përshkallëzim dramatik nga ana e Rusisë, pasi Moska e sheh këtë si një kërcënim të drejtpërdrejtë strategjik kundër territorit të saj. Një mundësi e dytë do të ishte nxjerrja e një faqeje nga libri i Luftës së Ftohtë duke këcënuar me kundërpërgjigje masive, përfshirë edhe përdorimin e armëve bërthamore. Mundësia e tretë do të ishte pranimi i përkohshëm i humbjes që do ta bënte NATO-n të dukej e pafuqishme dhe të niste një luftë të re të ftohtë me Moskën.
Sidoqoftë, lojërat e luftës ilustrojnë se ka hapa paraprakë që mund të lejojnë Shtetet e Bashkuara dhe aleatët europianë të shmangin mposhtjen katastrofike dhe të rrisin mbrojtjen e kufijve lindorë të NATO-s, ndërkohë që i bëjnë të qartë Moskës se nuk do të ketë një fitore të lehtë.
Shtatë brigada në zonë, përfshi edhe tre brigada të armëve të blinduara, mbështetur nga forca ajrore dhe artileria mund të jenë mjaftueshëm për “të parandaluar pushtimin e shpejtë të shteteve balltike, thuhet në raport. Këto forca shtesë do të kushtonin edhe 2.7 miliardë më shumë në vit.
Rezultatet mendohet se mund të priten ngrohtë nga zyrtarët e lartë të ushtrisë amerikane, që kanë argumentuar koston e mbajtjes së një trupe të madhe tokësore, pas shkurtimeve në buxhetin e mbrojtjes së viteve të fundit.
Që nga ndërhyrja e Rusisë në Ukrainë alarmi është rritur në Europën Lindore, por Shtetet e Bashkuara shumë herë kanë premtuar të mbrojnë Estoninë, Letoninë dhe Lituaninë në rast të ndonjë sulmi, duke cituar detyrimet e përbashkëta që rrjedhin nga aleanca e NATO-s.
Kufijtë që tre shtetet balltike, të treja ish-republika sovjetike- ndajnë me Rusinë dhe Bjellorusinë janë përafërsisht e njëjta gjatësi që ndante Gjermaninë Perëndimore nga pakti i Varshavës gjatë Luftës së Ftohtë. Por, në atë kohë, NATO kishte të pozicionuara forca të mëdha tokësore përgjatë kufirit me më shumë se 20 divizione të pajisura me tanke e artileri.
Me vetëm pak njësi këmbësorësh të gatshme në Balltik, SHBA dhe NATO janë të shqetësuar për grumbullimin e forcave ruse në Kaliningrad në bregun e Balltikut mes Polonisë dhe Lituanisë si dhe nga qëllimet e Moskës për të ndërtuar një forcë të re ajrore në Bjellorusi, shumë pranë kufirit polako-lituanez. Përgatiti: Juli Prifti – /tesheshi.com/
