Ushtria amerikane ka lajmëruar të dielën se do të rrisë fushëveprimin dhe kompleksitetin e stërvitjeve ushtarake evropiane, në përgjigje ndaj “agresionit rus”, ndërkohë që në Gjermani kanë arritur përforcime në formë tankesh, kamionësh dhe pajisjesh tjera të renda, përmes të cilave NATO-ja do të forcojë krahun e saj lindor në Evropë.
“Më lejoni të jem i qartë: kjo është pjesë e lëvizjeve tona për t’iu kundërvënë agresionit rus, për të siguruar integritetin territorial të aleatëve tanë dhe për të ruajtur një Evropë si të tërë, të lirë, të prosperuar dhe paqësore”, tha gjeneral-lejtnanti i Forcave Ajrore të SHBA, Tim Rayt zëvendës-komandant i Komandës Evropiane të Shteteve të Bashkuara.
Ray nënvizoi përkushtimin e fuqishëm të Shteteve të Bashkuara ndaj Evropës gjatë një vizite në Bremerhaven, një port gjerman në veri të vendit, në të cilën ai shënoi ardhjen e më shumë se 2.800 agregatesh ushatarake të cilat do të shfrytëzohen nga më shumë se 4,000 trupa amerikane, gjatë ushtrimeve të anëtarëve të NATO-s në kufi me Rusinë.
Forcimi i trupave të NATO-s dhe Shteteve të Bashkuara në Evropën Lindore, vjen pak ditë pasi agjencitë e inteligjencës amerikane kanë akuzuar presidentin rus Vladimir Putin për urdhërimin e sulmeve kibernetike dhe përhapjen e informacioneve të rreme, në mënyrë që të rrisë shanset zgjedhore të republikanit Donald Trump si dhe të diskreditojë kandidaten demokrate Hillary Clinton.
Ray vuri në dukje se rreth 70,000 trupa në Evropë po u përshtaten me shpejtësi sfidave të ndryshueshme strategjike, të tilla si veprimet ushtarake ruse në Ukrainë, vala e refugjatëve nga Siria dhe shfaqja e grupeve apo individëve radikalë.
“Tanket dhe kamionët e sapoardhur janë vetëm një pjesë e armëve më të mëdha që përfshijnë pajisje për hapësirë, hapsirën kibernetike, ajër dhe tokë”, tha Ray.
Ushtria amerikane dhe polake po përgatiten për ushtrime të mëdha që do të mbahen në fund të janarit.
Zyrtarët amerikanë kanë thënë se manovrat e këtij viti do të fokusohen në integrimin më të mirë të komponenteve dhe fushave të ndryshme ushtarake, në vend që të fokusohen në fushat individuale si epërsia në ajër, siç kanë bërë në të kaluarën. /tesheshi.com/
