Sapo ka lënë detyrën e ministrit të Drejtësisë i shkarkuar nga Rama, Ylli Manjani ka shpërthyer kundër Ramës personalisht dhe ish-kabinetit ku bënte pjesë:
“Kur hyra në qeveri gjeta një praktikë që nuk kishte lidhje me profesionalizmin dhe me Kushtetutën. Ministrat nuk lejohen të flasin në mbledhjen e qeverisë. Me Ramën, asgjë personale, vetëm parimore. Kryeministri i ka bërë presion kryetarit të Parlamentit që të më shkarkonte. Donte të më mbyllte gojën. Ankohej se flisja në media pa lejen e Fugës. Po fole pa lejen e Fugës, shkarkohesh. Po dhe mendim, shkarkohesh. Rri urtë, bëj nai tender apo koncesion dhe je në rregull. Ky është mesazhi i kryeministrit”, tha Manjani
Sipas tij, gjithçka ka nisur që kur ka denoncuar kanabisin, por dhe probleme të tjera të mprehta që kishin të bëjnë me qeverisjen:
“Denoncova se shteti nuk po mbronte investimet e huaja dhe pas kësaj deklarate në Këshillin e Ministrave u përzu dhe u rrah një biznesmen, duke e përzënë nga Shqipëria. Kam marrë nisma që më janë refuzuar në mënyrë të tmerrshme nga njerëz që nuk janë mbi ministrat. Këto kanë qenë debatet, por më i madhi është se pse flet me mediat. U shtua presioni pas deklaratës për kanabisin. E bëra atë deklaratë si qytetar i shqetësuar për këtë fenomen dhe e kam bërë pa asnjë paragjykim”, shtoi Manjani.
Më tej Manjani tha se nuk duhej larguar ai por ministri Tahiri, gjë që sipas tij i është kërkuar Ramës dhe nga ndërkombëtarët.
“Partnerët kanë kërkuar shkarkimin e ministrit të Brendshëm”, tha Manjani, duke shtuar më pas se është është i nderuar që nuk bën më pjesë më në qeverinë e Ramës”.
“Do isha ministër jetëgjatë nëse do të qepja gojën e të zbatoja porositë, por ndërgjegja ime qytetare e profesionale nuk ma lejonte këtë gjë”, theksoi ish-ministri i Drejtësisë. /tesheshi.com/
