Ministri i drejtësisë nga LSI, ka shfaqur sërish kontestime ndaj ligjeve që përbëjnë Reformën në Drejtësi, duke veçuar ato në kuadër të luftës kundër korrupsionit. Sipas tij, ato shkelin në mënyrë flagrante të drejtat e njeriut dhe privatësinë e tij.
“Padiskutim që organet e ndjekjes kanë të drejta që duhet ta bëjnë edhe pjesën e parandalimit edhe të përgjimit procedural por jo në banesë, jo në krevatin bashkëshortor dhe jo në tualet. Me audio dhe video thotë ligji. Kjo është një gjë krejtësisht e re dhe mund të gjykohet të lihet dhe mund të miratohet por që nga ky moment duhet të ruhemi edhe në krevatin bashkëshortor”, tha Manjani gjatë një tryeze.
Kritika e Manjanit vijoi sërish kur ligjin “Për parandalimin dhe goditjen krimit të organizuar, trafikut dhe korrupsionit nëpërmjet masave parandaluese”, e cilësoi si flagrant, pasi sipas tij nëpërmjet dyshimit i fut të gjithë në një thes.
“Të drejtat e njeriut në këtë formulim janë tashmë në rrezik dhe kjo në këndvështrimin tonë nuk është formulimi i duhur. Në Republikën e Shqipërisë çdo shqiptar është me indicie në kurriz. Indiciet janë nga më të ndryshmet, të gjithë ngrenë gishtin kundër dikujt për diçka dhe fare mirë në qoftë se e gjithë kjo frymë që ekziston për fat të keq në shoqërinë tonë, përkthehet në instrumenta të ndjekjes penale, i bie që të gjithë të hyjmë nganjëherë në burg dhe burgu bëhet si ushtria.”
Bëhet fjalë për gato 27 ligje që pritet të miratohen këtë sesion në kuadër të Reformës në Drejtësi. Ministri Manjani edhe më herët ka shfaqur padakortësi ndaj reformës, politikisht para se të miratohet dhe juridikisht pas miratimit. /tesheshi.com/
