Përmbytjet janë ndër fatkeqësia natyore më prezente në Shqipëri. Nuk bëhet fjalë pra për pandeminë COVID, e cila pothuajse nuk ka asnjë referencë, me e fundit pandemi haset 100 vite më parë, e që për më tepër është globale, por të cilën opozita e trajton si lokale në diskursin e saj akuzator. Po kështu dhe për tërmetin, me të cilin Shqipëria, në trajtë tragjedie, me viktima, ishte çmësuar prej 40 vitesh. Me përmbyjet ndodh ndryshe, pasi janë pothuajse njëherë në 3 apo katër vjet.
Si të tilla, ato duhet të gjykohen në nivele krahasimore edhe kur është fjala për politikë dite.
Fjala vjen, në turin e tij të dielën në disa zona të përmbytyra, kryeministri Rama u përqendrua në këtë pikë në avokatinë e tij të natyrshme mbi rolin qeverisës në këtë sektor. Ai tha se referuar treguesve të sasisë së reshjeve sot dhe dje, para investimeve në pastrimin e kanaleve kulluese dhe ngritjes së argjinaturave, kishte një rezultat, sipas tij, të dukshëm pozitiv. Përmbytje vërtet kishte patur, porse jo në atë shkallë sa ç’ishin vite më parë, me më pak reshje.
Ndërsa opozita, edhe për këtë rast u tregua dembele në qasje, duke u mjaftuar me atë retorikën e rëndomtë akuzatore.
Edhe ajo duhej të qëndronte në të njëjtin nivel si qeveria dhe të ofronte ballafaqime krahasimore. Më saktë, të përmendte llojin dhe mënyrën se si i ka përballuar ajo përmbytjet kur është përballur me to, ç’instrumenta ka përdorur dhe se si është gjendur pranë popullsisë së prekur për t’i ardhur në ndihmë; të thoshte se ç’i mungonte qeverisë së sotme në krahasim më të djeshmen në zhdërvjelltësi dhe strategji eleminini pasojash, si dhe të tregonte shifrën investuese në këtë drejtim. Kjo, edhe nga fakti që të dy kokat e opozitës, Basha si klasiku dhe Meta i kamufluar, kanë pas përvoja qeverisëse. Pra, nuk janë synues pushteti pa e patur kurrë atë, siç ishte Rama, gjithnjë në nivel ekzekutiv. Mungon kjo qasje krahasuese pothuaj në çdo fushë.
“Ku gabuam, por ku vepruam mirë”, mungon pothuajse fare në frymën e ligjërimit opozitar. Ndërkohë, kundërshtari i tyre është jo një por disa hapa para pikërisht në këtë sens: Rama luan fort me krahasimin, patjetër dhe me elementë propagandistikë të paevitueshëm, siç luan dhe me modelet.
Kur vjen puna te qeverisja lokale, ai i drejtohet gjithnjë opozitës: ne kemi modele suksesi, po ju a e keni?
Me të tilla mangësi thelbësore në një duel politik, sa shumë i duhet opozitës të reformohet, që do të thotë: sa shumë i duhet për të riardhur në pushtet! /tesheshi.com/
