Me afrimin e datës 7 dhjetor, ku sipas mazhorancës përfundon mandati i Kryeprokurorit Llalla, ka nisur dhe “sherri” tipik politik mes dy forcave të mëdha, që nuk pajtohen juridikisht me njëra tjetrën. Nga PS, ish-prokurori sot deputet, Ulsi Manja, tha se nuk ka asnjë dilemë për 7-ën, si datë kur Llallës i përfundon mandati.
“Kësaj çështje i ka dhënë përgjigje dhe kushtetuta dhe neni 109 2 i ligjit për organizimin dhe funksionimin e Prokurorisë në Republikën e Shqipërisë. Që do të thotë mandati i Prokurorit mbaron në datën 7 dhjetor 2017. Kuvendi i Shqipërisë do të ketë një përgjigje për këtë situatë të krijuar”, tha Manja.
Dhe është kundërpërgjigjur nga kahja tjetër mjeshtri i lojrave juridike, Oerd Bylykbashi, që, me logjikën se mazhorancës është që të kapë Prokurorinë e Përgjithshëm, ajo po shkel dhe ligjin.
Kushtetuta përcakton Këshillin e Lartë të Prokurorisë si organin që deklaron fundin e mandatit të Prokurorit të Përgjithshëm. Pra organi kushtetues i parashikuar nga kushtetuta është KLP. Fakti që kanë lënë boshllëk kushtetues për këtë çështje është një problem që nuk zgjidhet as me deklarata, as me memo dhe as me ndonjë ligj apo rregullore të Kuvendit sepse është normë kushtetuese që duhet të jetë aty”, tha Bylykbashi.
Është ky një paralajmërim se “Lalla” do jetë “mollë e freskët sherri” këto ditë. Ai vjen si i zgjedhur nga mazhoranca e djeshme, sot opozitë, ku gjatë gjithë ushtrimit të detyrës herë-herës ka shfaqur qartë dhe preferenca politike të caktuara, ndërkohë që nuk mundi të lërë asnjë gjurmë anti-krim apo anti-korrupsion. /tesheshi.com/
