Nga Blendi Gashi
Ndërsa ende nuk dihet se kur Gjykata Speciale do të nis punën e saj, pra të bëj ngritjen e aktakuzave të para, një misioni tjetër ndërkombëtar për sundimit e rendit dhe ligjit në Kosovë, EULEX-it i kanë mbetur edhe katër muaj mandat, për çka edhe shumicën e lëndëve të ndjeshme të korrupsionit ja ka dërguar drejtësisë kosovare.
Pas qershorit nuk dihet se çdo të bëhet me këtë mision i cili për asnjë moment nuk për mbushi pritshmëritë e kosovarëve, pasi nuk arriti të dërgojë prapa grilave asnjë të ashtuquajtur “peshq të mëdhenj”.
Se fati i këtij misioni mbetet i paqartë, e thanë të enjten edhe drejtues të EULEX-it dhe drejtësisë kosovare.
Ministri i Drejtësisë, Abelard Tahiri, në vizitën që ia bëri të enjten Institutit të Mjekësisë Ligjore, tha se ende nuk kanë ndonjë marrëveshje se çfarë do të bëhet pas skadimit të mandatit të EULEX-it, në qershor të këtij viti.
“Pa dyshim jemi në fazën e konsultimeve dhe ende nuk kemi ardhur në përfundim për rolin pas qershorit për EULEX. Dua t’i falënderoj për angazhimin dhe vullnetin për të ngritur kapacitetin e këtij instituti. Angazhimi i EULEX ka qenë i madh. Në momentin kur do të kemi një marrëveshje, ne do ta publikojmë”, tha Tahiri.
Kurse shefja e EULEX-it, Alexandra Papadopoulou tha se do të vazhdojnë të përkrahin dhe të asistojnë në raste për Kosovën.
E pyetur se çka do të bëhet pas mandatit të EULEX-it, Papadopoulou deklaroi se ende nuk kanë zgjedhur mënyrën se si ta ndihmojnë Kosovën pas skadimit të mandatit.
“Nuk mund të flas se sa raste kanë mbetur. Ne do ta përkrahim dhe to të asistojmë në raste për Kosovën. Ne, ende nuk e kemi zgjedhur mënyrën se si do ta ndihmojmë Kosovën, pas skadimit të mandatit tonë këtu”, tha ajo.
Edhe vet drejtues të BE-së kanë deklaruar në janar të këtij viti se është duke bërë rishikimi e mandatit të misionit EULEX-it.
Maja Kocijançiç, zëdhënëse e BE-së ka thënë për mediat kosovare se deri në qershor do të vendoset për të ardhmen e EULEX, duke mos dhënë më shumë detaje nesh mandati mund të vazhdohet edhe pas qershorit.
Megjithatë Kocijançiç ka sqaruar se mandati i EULEX nuk është i lidhur me punë e Gjykatës Speciale ndonëse u raportua se ky mision do të jetë në Kosovë edhe për 4 vjet duke e lidhur me fillimin e punës së gjykatës.
“EULEX-i ka luajtur rol administrativ gjatë themelimit të gjykatës. Dhomat e Specializuar dhe Prokurori Special janë plotësisht të pavarur në bazë të Ligjit të miratuar nga Parlamenti i Kosovës. Sipas Ligjit, Udhëheqësi i Misionit të EULEX-it ka rolin e një autoriteti emërues”, ka thënë ajo.
Viteve të fundit, misioni i EULEX-it është transformuar duke marrë më shumë karakterin e një misioni këshillëdhënës dhe mentorues për institucionet e Kosovës në fushën e sigurisë dhe të drejtësisë.
Njëzet procese gjyqësore i ka dorëzuar te gjyqtarët vendorë në Gjykatën Themelore të Prishtinës, gjatë tre vjetëve të fundit.
Në mesin e tyre janë edhe të akuzuar të profilit të lartë, si Sami Lushtaku, Ukë Rugova, Azem Syla dhe Enver Sekiraça. /tesheshi.com/
